البقاء لله يا ريس

البقاء لله يا ريس .. انا ابني مات وهو بيحاول يهج من البلد ويروح اليونان .. غرق هو واصحابه فيه منهم الي رجع ومنهم الي اكله السمك اصله مبيعرفش يعوم .. ومعرفوش أهله يلفوه بعلم مصر الحرير أصله ناكر للجميل ورمى بنفسه في التهلكه
البقاء لله يا ريس .. انا ابني الوحيد مات وهو واقف يستنى الترام .. وقعت على دماغه المحطه - رغم انها كانت جديده - ومات في الحال كان شايل في جيبه وقتها جواب ترشيحه لكلية الطب غلطته انه استنى التروماي
البقاء لله يا ريس .. انا ابني مات متكهرب وهو بيعوم في حمام سباحه غلطتي اني لبسته مايوه وملحقتش اسفره باريس ولا حتى يوصل المستشفى الميري .. لان صاعقة الكهربا كانت اسرع .. قدر ربنا وعطيته استردها
البقاء لله يا ريس .. انا ابني مات وهو بيدافع عن شباب البلد دي ضد تاجر مخدرات .. وكان يدوب عريس جديد ومطلعش حتى بزفة جنازه عسكريه بعد موته
البقاء لله يا ريس .. انا طفلي مات وهو بيتفرج على فرح من البلكونه برصاصه طايشه شقاوة عيال يا ريس
البقاء لله يا ريس .. أنا ابني كان عندكم في القسم خدوه من الشارع سليم رجعلي جثه .. واحتسبته عند الله شهيد .. مش هو كده شهيد يا ريس؟؟
البقاء لله يا ريس .. أنا ابني دكتور الجامعه مات وهو خارج من صلاة الفجر..عشان يسرقوا منه الموبايل .. غلطان حد قاله يخرج في ساعة متأخره كده وكمان يشيل موبايل
البقاء لله يا ريس .. أنا طفلى بيموت كل يوم في المستشفى من سرطان وامراض الدم وعيوب خلقيه و .... لاني معيش تمن امبول الدواء .. و مستنيه نفقة الدوله .. قبل ما يموت زي الحيونات النافقه على سرير مستشفى حكومي
البقاء لله يا ريس .. انا اب ابني مات مولع في قطر الصعيد ومكنش حيلتنا غيره .. فات وسابلنا كوم لحم مراته وعياله وانا عاجز ومريض .. ياما قلتله بلاش تركب درجة تالته واطلع على السطح أو خليك في السبنسه
البقاء لله يا ريس .. انا ابني ومراته ماتوا في عمارة لوران في اسكندرية .. كانوا لسه عرسان مكملوش شهر العسل .. كان نفسي اشوفلي اي حفيد .. الا يعني ايه حفيد يا ريس ؟؟
البقاء لله يا ريس .. انا والد اسلام فاكره يا ريس ؟ ؟ اسلام اللى المدرس ضربه في قلبه موته رغم ان قلبه كان سليم وبكامل صحته .. كان من اشطر واهدى طلاب المدرسة .. ضربة قلبه حرقت قلبي عليه
البقاء لله يا ريس .. انا اب من الدويقة او كنت من الدويقة رجعت من شغلي لاقيت اطنان حجارة فوق اولادي ومراتي .. حاولت اغسّلهم معرفتش .. اصلهم طلعوا اشلاء بعد يومين وتلاته واسبوع .. كان نفسي صورهم تنزل في التليفزيون او حتى يتكتب اسمهم في جرنان اصفر يا ريس
البقاء لله يا ريس .. انا جد زيك مات ابني ومراته وعياله في عبارة السلام من البرد والغرق .. حد قالهم مياخدوش عوامات معاهم .. بس الحمد لله مماتوش لوحدهم اكتر من الف واحد مات معاهم .. وتخيل يا ريس ان التليفزيون مقطعش الارسال ولا ساعه واحده بالعكس ده سابلنا الماتش نتفرج عليه ونفرح بالفوز .. والاجمل ان صاحب العبارة طلع براءة من قتلهم .. اصلهم ماتوا موتة ربنا .. صحيح مش على فرشتهم ولا فرش خمس نجوم في مستشفى في باريس .. بس تعرف وحشوني اصل اعز الولد ولد الولد كان نفسي اشيل جثمانهم حتى يا ريس
البقاء لله يا ريس .. احنا شعب مصر كله الي مات واندفن من اكتر من 25 سنه من الفقر والجوع والمرض والتخلف والتعصب والقوانين وبلاش اكمل .. متزعلش يا ريس عمرحفيدك التاني ربنا يباركلك فيه
الموت مبينساش حد .. أول الشهر احتفلت بعيد ميلادك .. اعتقد دي اخر مره هتحتفل بيه - بعد الشر عنك يا ريس - انا اقصد مش هتحتفل لانه مينفعش تحتتفل بذكرى ميلاد وموت في نفس الشهر .. ربك يصبرك ويصبرنا .. حاولت افتكر قد ما اقدر الناس الي ماتوا بس الذاكره مستحملتش من كترهم .. نهايته ..
البقاء لله يا ريس


اسيبكوا مع الخبر الي بيقول
إنشاء حديقة باسم «محمد علاء مبارك» بعد ساعات من تشييع جنازته.. و1000 شجرة لتخليد ذكراه
بعد ساعات قليلة من تشييع جنازة حفيد الرئيس مبارك، بدأت السواعد تسابق الزمن لإنشاء أول حديقة تحمل اسم «حديقة الطفل (محمد علاء مبارك)» فى القاهرة الجديدة بمحافظة حلوان، على أن يتم افتتاحها السبت المقبل لتصبح بذلك أسرع حديقة فى العالم.
تقام الحديقة بالجهود الذاتية، على مساحة 10 آلاف متر، وتحتوى على 1000 شجرة، وبعض أنواع الزهور، وجاءت بمبادرة من إدارة مدرسة «كيمبريدج مصر» الخاصة وأولياء الأمور والتلاميذ، بهدف تخليد ذكرى حفيد الرئيس، الذى وافته المنية الاثنين الماضى.
يقول حمدى على، مدير المدرسة: «قررنا تحويل الساحة الصحراوية المحيطة بالمدرسة إلى ساحة خضراء، وغرس 1000 من أشجار الظل والزينة والفاكهة، وإحاطتها بالزهور، لكى تتحول الساحة الصحراوية إلى حديقة عامة، مزودة ببعض الخدمات والألعاب الترفيهية المجانية، لخدمة أهالى المنطقة وتلاميذ المدرسة».
بدأ العمل فى زرع الأشجار منذ الساعة الثانية بعد منتصف ليل الثلاثاء، ويتواصل حتى افتتاح الحديقة رسمياً السبت المقبل، ويشارك فى العمل عدد من طلبة ومعلمى وإداريى وعمال المدرسة، الذين حرصوا على غرس الأشجار بأنفسهم.
وعن سبب إطلاق اسم الراحل «محمد علاء مبارك» على الحديقة قال مدير المدرسة: «تلاميذ المدرسة، الذين تتقارب أعمار معظمهم مع عمر الفقيد، هم الذين اقترحوا الفكرة، فوافقت عليها الإدارة، وكل تلميذ غرس شجرة، ثم علق عليها (كارت) يحمل اسمه، وكتب عليه إهداءه الشجرة لروح الفقيد».
إبراهيم نور الدين ـ أحد أولياء الأمور ـ يقول: «تعميم تجربة العمل الأهلى من أسمى الأهداف التربوية التى نسعى لترسيخها لدى أطفالنا، وهو ما جعلنا نشارك بأنفسنا فى مبادرة زراعة الألف شجرة، ونتمنى أن تكون المبادرة بداية لتحقيق حلم إحاطة القاهرة بحزام أخضر»
ويرى مروان سرى، طالب بالمرحلة الثانوية، أن غرس الأشجار أجمل ما يمكن أن يهدى إلى حفيد رئيس الجمهورية، كما يعتبر أن الحديقة إحياء لذكرى جميع أطفال مصر، الذين وافتهم المنية فى عمره».


جملة اعتراضية:.اشمعنى دلوقتى

انالله وانا اليه راجعون فجيعه اسره صغيره امتدت وبتلقائيه فطريه تحولت الي وجيعه الاسره الاكبر هوده الشعب المصري ينفرد بهذه الخاصيه الفريده برغم كل شيىء حزن وتعاطف صوره الطفل خطفت قلوبنا

انا معنديش اعتراض والله
وانا كمان زعلت على محمد اوى اوى
بس كمان زعلت وبكيت على كل ام ابنها مات ومش قادرة تقول اة
وعلى كل مظلوم اتعذب ومش عارف ياخد حقة
وحتى برضو مش قادر يقول اة
اشمعنى احنا بقث قلوبنا كلنا زى الخساية لما حفيد الرئيس مات
وكانت قلوبنا زى الحجر الصوان لما الاف من الشعب ماتوا ولا حد حس بيهم
اشمعنى هنا اهم ما يميزنا الدمعة المكتومة او الدمعة ع الخد
واشمعنا هناك اهم ما يميزنا اللامبالاة ومصمصة الشفايف
انا بس الفكرة اللى انا عاوز اقولها
ان معايرنا تكون واحدة هنا وهناك
نزعل ع الفقيرونزعل ع الغنى برضو
نزعل ع الضعيف قد ما بنزعل ع القوى والمسيطر
دى بس فكرتى
اتمنى تكون وصلت
واتمنى تكون مظبوطة

شكرا يا ادهم على موضوعك وعلى فكرتك الى بتعبر عن كثير مم فى صدور الكثير ان لم يكن كل الشعب المصرى
نعم حزن على جد يفقد حفيده وعلى اب وام يفقدون اعز واغلى ما فى الحياة لاكن اكيد حزنن على شعب
يحطم ويموت من ابناءه كل يوم المأت بين عبارة ا و قطار او سموم او مركب يحمل شباب الامة يغرق
وهو يحول الفرار بحلمه فى حياة كريمه او شعب يقتل ابناءه بعضهم بعض من اجل الحصول على رغيف عيش
حزنن على شعب ينزف الدم والحلم والامل فى مجرد العيش بكرامة هو ده حزنن الاكبر وهو ده همن الاكبر
مشكور يا ادهم موضوعك ده اكدلى انى بتشرف بمعرفتك اوى تقبل ودى وصدقتى ودمت بخير

الشرف ليا انا يا محمد والله
انا اتشرف انى وسطكم
ربنا يخليك يا محمد على كلامك الحلو
ومرورك الجميل
واسلوبك الساحر