يوميات مدرسه أجن من الطلبة

الأحد أبريل 10, 2011 9:43 pm تقييم المساهمة: 100% (1)

السلام عليكم ورحمة الله وبركاته
انا هنا ان شاء الله هاحط تانى قصة ليا و هى يوميات مدرسه أجن من الطلبة و يارب اليوميات تعجبكم زى صعيدى بيحب بنت استيل

مممم

أنا مدرسة كمبيوتر

و الشغلانة النكد دى باشتغلها من ساعة ما اتخرجت يعنى من 3 سنين تقريباً

و للأسف السنة دى روحت أشتغل فى مدرسة جديدة غير مدرستى اللى كنت بادرس فيها للأطفال الصغننين

المهم انى فى المدرسة دى لما قروا الابلكيشن بتاعى و عرفوا انى دارسة فيجوال بيزيك
( الهى كنت انشكيت فى دراعى قبل ما اكتب كدة )

و المصيبة بقى ان البرنامج ده المنهج الجديد بتاع حبايب قلبى ملائكة الأرض 3 اعدادى

و طبعاً لما صدقوا لأن ما حدش فى المدرسة درس البرنامج الزفت ده قبل كده ففرحوا قوى و قالولى انتى بقى تدى 3 اعدادى

يا ناس يهديكم يرضيكم ده انا طول عمرى بادى العيال الصغيرة

لأ ده العيال هنا فى منتهى الرقة و الوداعة زى النسمة
( ربنا ما يوريكم )

و للأسف وافقت ( و دى كانت غلطة عمرى )

و دخلت الفصل فى أول حصة ليا و كانت حصة صبيان

دخلت لقيت قدامى 40 شحط أطول و اعرض منى و فيهم اللى بشنب و دوجلاس كمان

و العيال بيبصوا لى بصات غريبة مرعبة
زى بصات ريا و سكينة

كان اللى ناقص انهم يجيبوا المنديل و يا اختى عليها يا اختى عليها

و الله لولا ان قعدة البيت ممله كنت جريت و سبت المدرسة تولع بيهم

بس انا ما باحبش برضه استسلم بسهولة

المهم شمرت و قولت استعنا على الشقا بالله

و ما حدش بياكلها بالساهل

و قوينا على الشر يا رب

و ابتدت المعاناه ......................

الإثنين أبريل 11, 2011 6:00 pm

الثلاثاء أبريل 12, 2011 10:02 am

و دخلت الفصل فى أول حصة ليا و كانت حصة صبيان

دخلت لقيت قدامى 40 شحط أطول و اعرض منى و فيهم اللى بشنب و دوجلاس كمان

و العيال بيبصوا لى بصات غريبة مرعبة
زى بصات ريا و سكينة

كان اللى ناقص انهم يجيبوا المنديل و يا اختى عليها يا اختى عليها
يوميات مدرسه أجن من الطلبة 2442582106

بدايه جميله قلبى معاها اختيارك موفق يا حسام باتابع معاك

الثلاثاء أبريل 12, 2011 5:37 pm

مرسي يا سحر انا كنت خلاص هاقول محدش عاوز يكمل القصة بس انتى رفعتى من روحى

الحلقة الثانية
=============================================

أول حصة ( تعارف )

انا أول ما دخلت توقعت ان كلهم يقوموا يقفوا ( العادى يعنى على اساس انى الميس )

بس مين فضلوا قاعدين زى ما هما فقولت أقولهم كلمة يمكن ياخدوا بالهم منى

فقلت لهم سلاموا عليكم

ففيه واحد و لا اتنين و الله ما انا فاكره ( ربنا يكفيكوا شر الزهايمر ) اللى ردوا عليا بس و هما قاعدين مطرحهم ما حدش هان عليه يقوم يقف

بس ما سكتش بقا و الشر ابتدا

قولتلهم فى ايه يا سنه زفت هو انا جايه اشتغل فى مدرسة مشلولين قوم يا شحط انت و هو اقف و انا من جوايا باترعش و خايفه من رد فعلهم

و العيال فى محاوله لجس النبض فيهم اللى و قف و فيهم اللى ما وقفش

المهم قولت بلاش اعملها حكاية و الطيب احسن برضه

فقولت لهم الناس المحترمة اللى وقفت كل سنه و هما طيبين

و الكلمة تقريبا حركت كام واحد ابن ناس كده فالعدد زاد كام واحد

و كلهم راحوا ردوا و حضرتك طيبة

فقلت لهم اتفضلوا اقعدوا و قولت اقدم نفسى بقى فقلت لهم انا مدرسة الكمبيوتر الجديدة و ان شاء الله هاديكم السنة دى

فكام واحد رزل كده فى نفس واحد هيييييييييييييييييييييييييه

المهم فوت و قولت اهو ترحيب برضة احسن ما كانوا قالوا ييييييييييييييييييييه

قولت لهم عايزه بقى اتعرف عليكم واحد واحد بالدور كده يقولى اسمه ايه طبعا و انا بابتسم ابتسامه صفرا ( أعمل ايه العيال شكلها يخض )

فابتدوا يردوا اللى يقول اسمه و اللى يقول اسم الدلع

وواحد قاللى أول ما اروح هابقى اسألك ماما هى كانت قالته لى الصبح بس نسيته

فروحت مطلعه له الموبايل و أنا رافعه حاجبى اليمين عند منبت شعرى تقريباً و قلت له طب ما تتصل بيها تسألها يا حبيبى أحسن
و واحد قاللى محمد
فقلت له ماشى يا محمد
فقاللى لأ ده اسم ابن خالتى انا بقى على و واحد رزل قاللى مش فاكر ثانيه واحده اشوفهولك فى القايمه و التانى قاللى أخ نسيته هاطلع الكشكول اشوفه أصل ماما بتكتبه لى على التيكيت

فقلت له لأ يا ظريف خليها تبقى تكتبه لك على القميص المره الجايه

و واحد قاللى انا بقى ما اعرفوش اصل احنا كتير فى البيت و طول اليوم ماما بتنده فباتلخبط بس هو العموم يا محمود يا مصطفى يا احمد يا اما منى أو مروة مش عارف و الله و واحد قاللى ولا يا عمرو هو انا اسمى ايه
فقلت له يعنى عمرو عارف اسمك و انت لأ و بعدين انت فاكر اسم عمرو و اسمك لأ
فقالى أه أصله صاحبى و بعدين ما هو بيندهلى على طول فأكيد عارفه و التانى قاللى اسمى زفت بابا ما بيقوليش غير كده فى البيت

و واحد قاللى هو حاجة عبد الله

فقلت له يعنى فاكراسم ابوك ومش فاكر اسمك

فقاللى استغفر الله العظيم يعنى عايزانى ما افتكرش اسم الراجل اللى خيره عليا و بأكلنى و بيشربنى يا ميس حرام عليكى و الله

و التانى قاللى لأ اصل انا ساقط قيد و ما عنديش شهادة ميلاد بس المهم انتى اسمك ايه

فقلت له ثانية واحده كده يا ابنى اصل انتوا شككتونى فى نفسى و روحت مطلعة البطاقة و قريت لهم اسمى منها فقعدوا يضحكوا و ضحكت معاهم طبعاً

و الحصة كلها خلصت فى التعارف لغاية ما الجرس ضرب

انتظرونى فى الحصة القادمة

الأحد أبريل 17, 2011 11:23 am

هى مشكله صعبه تقارب سن الطلبه والمدرسين واختفاء صوره المدرس والمرسه الكبيره الوقوره كمان دلوقت الاولاد والبنات بقوا يشوفوا المدرس ده بطريقه تانيه خالص مش بقى فيه احترام زى الاول والدروس الخصوصيه بقى الطالب هو الاهم وفلوسه مش العلم والمدرس

باتابع معاكم
صباح الخير

الأحد أبريل 17, 2011 2:30 pm

تسلم الايادى الله ينور ياباشا

يوميات مدرسه أجن من الطلبة 4257603904

الإثنين أبريل 18, 2011 6:32 pm

عندك حق فعلا يا حلا بس انا متفائل فى مصر الجديدة

تسلم عاشق السهر على مرورك و كلامك الجميل

الحلقة الثالثة
=============================================

فصل البنات

بعد ما نزلت من فصل المعاتيه ده قولت ابص فى الجدول فلقيت الحصة الجاية فى 3/2

فقولت لهم و 3/2 ده بقى فصل بنات و لا صبيان

فقالوا لى لأ بقى اطمنى ده فصل بنات

فقلت الحمد لله

و قعدت أغنى بينى و بين نفسى لحسن يقولوا عليا مجنون

** البنات البنات الطف الكائنات **

و طلعت الحصة وانا كلى أمل

و أول ما دخلت الفصل لقيت برضة نظرات غريبة

بس المرة دى النظرات بقت نظرات فحص من فوق لتحت زى ما تكون كل واحدة فيهم حما و هاتجوزنى ابنها

المهم ابتسمت لهم و استنيت انهم يقفوا

بس فضلوا قاعدين و متنحين زى الكبب

قولت مش مشكلة و دول برضه بنات و دخلة الشلل و قوم فز مش هاتنفع معاهم

فقلت لهم كل سنة و انتوا طيبين

فردوا بس من غير نفس و انتى طيبة

فقلت لهم انا مدرسة الكمبيوتر الجديدة

فقامت واحدة و قالت لى ليه ؟

فقلت لها هو ايه اللى ليه يا حبيبتى

قالت لى ليه حضرتك اللى هاتدينا امال فين ميس رباب

قلت لها مشيت

راحت فين

الله اما طولك يا روح

قولت لها ما اعرفش راحت فين

فقامت واحده تانية و قالت لى يعنى سابت المدرسة

فقلت لها اه

فقالت لى احسن دى كانت رخمة

فقلت لها بلاش نجيب فى سيرة حد خلينا فى نفسنا

فقالت لى على رأيك يا ميس هو حضرتك متجوزة

و البت عينها على ايدى و شايفه كويس ان مافيهاش دبلة بس رخامة بقى

فقلت لها لأ يا حبيبتى

فقامت واحده تانية رخمة و قالت لى طب عندك ولاد يا ميس

قلت لها لأ أصل الافندى بتاعى عايزنا نأجل كام سنه يا حبيبتى

فسمعت بت رذله و هى بتقول ههها

فقلت أكبر دماغى بدل ما اجيبها من شعرها

و عملت نفسى ما سمعتش حاجه

و حبيت ابتدى معاهم فى المنهج بقا

و قلت لهم احنا السنه دى هاناخد برمجة ان شاء الله

لقيت النظرات كلها قلبت على تخلف عقلى كده و الشفايف التحتانية دلدلت و بقى شكلهم اهطل من بعض

فقلت لهم ايه يا جماعة باقول برمجة Visual basic يعنى

فقالوا لى هه

يا دى النيله على طقم العبط اللى وقعت وسطيه

يا بنتى انتى و هى البرنامج سهل و الله و ان شاء الله هانعمل بيه حاجات لذيذه جداً

و الله ما انا عارفه باضحك عليهم و لا على نفسى

ما هو الصراحة بقى دى مش خلق برمجة و لا خلق كمبيوتر حتى

الله يخرب بيت التدريس و اليوم الاسود اللى درست فيه

الله يسامحك يا قاسم يا امين ما كان زمانى قاعده فى البيت كافيه خيرى شرى و ما كنتش شوفت العاهات دى

المهم حاولت معاهم يمين شمال انهم يفهموا بس الحمد لله فى الأخر فهموا

أو هما حاولوا يوهمونى بكده عشان ما ارغيش اكتر من كده و يخلصوا منى

الا كام واحده كده أرخم من الرخامه فضلوا يبصوا لى زى ما اكون السبب فى طلاق امهاتهم

بس الحمد لله خلصت الحصة على خير قبل ما اخنق لى واحده منهم و لا اتنين

السبت أبريل 30, 2011 9:13 pm

الحلقة الرابعة
=============================================

أول ما دخلت الحصة ما بقيتش اهتم مين واقف و مين قاعد خلاص بقى
دخلت رميت الكتاب و الكشكول اللى فى ايدى على الديسك الأول و صبرت دقيقتين على ما يسكتوا
و بعد كده لقيت عيلين افتكروا يقفوا
قلت لهم اترزع ياد انت و هو
طب يا ميس مش هاتسلمى علينا
لهم اسلم على مين خسارة فيكوا السلام أسلم عليكم على ايه جاتكم ستين خيبة
و ابتديت اكتب الدرس و طبعاً كالعاده السؤال الممل هو الدرس طويل يا ميس
فبصيت لهم و قلت لهم بصوا بقى فى يومكم الاسود ده اللى عايز يتنيل يكتب يكتب و اللى مش عايز ان شا الله عنه ما كتب انتوا فاهمين
و كملت كتابه
و فجأه سمعت صوت أه يا ايدى لا يا ميس مش قادر اكتب اكتر من كده
روحت رايحه له و مسكت ايده
و قلت له ايدك دى اللى بتوجعك يا سوسو وريهالى كده يا حلوه
و قمت تانيه له صوابعه لحد ما صرخ
و رجعت اكتب
لقيت واحد بينده يا ميس ماعييش كراسه
خلاص ما تكتبش
طب و افهم ازاى
اكتب فى ورقة
ما انا معايش ورقة حتى
قلت له خلاص خد كشكول حد و انقل الدرس
هانقله فين أصل انا ما عنديش كشكول فى البيت
خلاص خلى ابوك يعمل جمعية و يبقى يقبضها الاول و ادفع مقدم كشكول
ورجعت تانى اكمل كتابه لحد ما خلصت
و جيت اشرح يا مؤمنين و دول ركبهم العفريت كلام و هزار و استظراف
و انا عماله يا ابنى بس انت و هو يا حبيبى خلاص الله اما طولك يا روح
روحت قاعده لهم على الديسك
و قلت لهم شكلكم مش عايزين الدرس مش كده خلاص بلاش منه
راح قام لى واد قاللى بس انا عايز افهم يا ميس
قلت له حاضر يا حبيبى عايز تفهم ايه
قالى الدرس
فقلفت لهم طب مين تانى عايز يفهم
فكلهم رفعوا ايدهم و قالوا احنا يا ميس
فقومت واحد غبى اسمه عمرو
و قولت له و انت كمان عايز تفهم يا عمرو
فقالى أه
عايز تفهم ايه
افهم اللى هايفهموه
طب اللى هو ايه
راح متنح و قاللى مش عارف ؟ اللى مكتوب ده
طب هو انت عارف اصلا انا هنا بادرس ايه
فضحك و قالى اه كمبيوتر
قلت اسم الله عليك طب و احنا السنه دى بندى ايه فى المنهج
فبرأ كده و ما نطقش
فقام واحد أذكى منه و قالى بندى ايه يا صباح الفجوله يا ميس
قلت له يسعد صباحك يا حبيبى و بصيت لعمرو و قلت له زى ما الحمار ده قال بالظبط
فقالى ماشى
قلت لهم يعنى كلكم عايزين تفهموا طب اسكتوا بقى
كلهم فى نفس واحد حاضر يا ميس
و لسه هابتدى انطق
راح قام واحد قالى انا بقى مش فاهم
مش فاهم ايه و انا لسه اتكلمت
يا سلام أصل انا كنت نايم فباحسبك شرحتى شويه
و قعدوا يضحكوا و رجعوا يتكلموا تانى
فقلت لهم يا صباح الاستهبال خلاص بقى مفيش درس
و انا قاعده لكم النهارده عشان تبقى حصة سوده عليكم
و طلع لى عيل رزل و اشقى خلق الله و قالى اروح الحمام يا ميس
بس فرصتى بقى عشان اذلهم و انتقم
ما فيش حمامات يا لا
و الله مش قادر اروح و النبى
لأ الحمام قفلوه خلاص
لو ما روحتش هاعملها على نفسى
لو راجل اعملها
و الله ما قادر أبوس ايدك
إوعى تعملها اوديك فى 60 داهيه
خلاص هاتصرف فى أى درج
لو اللى تحت مناخيرك ده شنب اعمل كده
و الواد كان هايعيط فعلاً
قلت له عايز تروح يا كريم
أه و النبى يا ميس و حياه ابوكى
روحت زاغداه فى كتفه و قلت له مالكش دعوه بابويا يالا
حاضر بس اروح بقى
قلت له هات القلم
و روحت عند السبورة و رسمت شجرة
قالى ايه ده
قلت له هاوديك لما الشجرة دى تطرح تفاح
يا نهاراسود انتى بتهزرى يا ميس و الله هاموت
و ايه يعنى ما تموت ما انا كمان هاموت على التفاح و المرتب قليل و مش مكفى
يا ميس ابوس ايدك اروح الحمام
لأ
طب اعمل ايه
اروى الشجرة عشان تنبت
ارويها ازاى
و انا مالى شوف انت بقى
الواد لطم على وشه يا ميس و الله ما قادر
و انا صدرت العبيطة و قلت له انت سمعت شرطى
علشان تبقى تقعد تهزر كويس و انا باشرح
خلاص اخر مرة و الله ما هاهزر تانى ابوس ايدك
لالالالالالالالالالالالالالالالالا
خلاص انا هاروح ماشى
روحت مشاوره له يدخل جوا
راح رايح ناحية الباب
روحت رايحه واقفه عند الباب وفتحته
أروح بقى
روحت باصه له من فوق لتحت
حاول يطلع من الباب شنكلته اتكفى على وشه
و قومته من قفاه
و رميته جوا الفصل
فدخل الديسك بتاعه و هو بيبص لى بغل
بس على مين و لا همنى
راح قايم واد تانى يستهبل و يخف دمه
فبارزعه على كتفه و القلم بقدرة قادر رن على وشه
فروحت راجعه لورا
قالى ايه ده يا ميس
فبخوف كده قلت له ايه مش انا الميس بتاعتك حبيبتك عادى يعنى
ما هى الكتره تغلب الشجاعه يا اخوانا
قالى ماشى و برق لى
فرجعت لورا و ضحكت له و انا من جوايا باتنفض
و الحمد لله ربنا نجانى أصل الجرس ضرب و قلت يا فكيك

السبت أبريل 30, 2011 9:36 pm

فبخوف كده قلت له ايه مش انا الميس بتاعتك حبيبتك عادى يعنى
ما هى الكتره تغلب الشجاعه يا اخوانا
قالى ماشى و برق لى
فرجعت لورا و ضحكت له و انا من جوايا باتنفض
و الحمد لله ربنا نجانى أصل

هههههههههههههههههههههههههههههههههههههههه

فى انتظار باقى الحلقااااااااااااااااااااات ربنا معاها

السبت أبريل 30, 2011 9:43 pm

يا نهاااااااار سهر بنفساهااا هى الي بترد مرسى يا جميل

علشان المدرسين يخلوو بالهم و يبطلوو تعليم

السبت أبريل 30, 2011 10:33 pm

كل سنه وانتى طيبه يارحاب وتحققى كل احلامك ان شاء الله
يوميات مدرسه أجن من الطلبة 1265107091

السبت أبريل 30, 2011 10:34 pm

كمان تورته مخصوص لحسام
يوميات مدرسه أجن من الطلبة 1265107091

السبت أبريل 30, 2011 10:45 pm

:D هممممممم لوحدى

انا هاكلهاا كلها لوحدى

كل سنه وانتى طيبه يارحاب
كل سنه وانتى طيبه يارحاب
كل سنه وانتى طيبه يارحاب
كل سنه وانتى طيبه يارحاب

ابعتيلى البيبسى و انا اكتب فى كل ردودى كل سنه وانتى طيبه يارحاب

الأحد مايو 01, 2011 10:09 pm

الحلقة الخامسة
=============================================

مرت الأيام عليا فى المدرسة أسود من بعضها و الحمد لله لغاية ما جه يوم عيد الحب
طبعاً اليوم ده بيبقى احمر على الناس كلها
بس بصراحه حبايب قلبى خلوه يوم أسود من السواد
اليوم ده يا اخواتى ابتدا من الطابور
أولها مدرسة الموسيقى اللى فاكره نفسها ليلى مراد قعدت تنعر ( سورى تغنى ) و الحب ما لينا غيره و الله ما لينا غيره
و العيال شكلها طالعه من الأحداث أصلاً
و دى عماله تديها لغاية ما جابت لى صداع
و كان هاين عليا أطبق فى زمارة رقبتها عشان تخلص
لأ و كمان صاحب المدرسه منه لله قعد يدينا محاضره فى الحب و حب زميلك و حب الطلبه بتوعك و ياله عاوز اشوف الحب
مش عارفه أوريله الحب ازاى ابن المجنونه ده
لأ و الأمر واحد زميلنا عامل زى درفة الدولاب مسك المايك فى الاذاعة على الصبح كده و على غيار الريق و الواحد لسه ما فطرش و قعد يمتعنا بصوته بيغنى بالدراع على فكرة مش عشان صوته حلو و العيال لازم غصب عنهم يصقفوا و على الله يقفش عيل ما بيصقفش يبقى يوم اللى خلفوه اسود
المهم خلص الطابور على خير بدون وقوع خسائر فى الأرواح
و انا و لله الحمد قدرت اتوازن بعد 2 كيتوفان و طلعت الحصة

الحصة الأولى كانت فى فصل البنات
دخلت و بعد سلامو عليكم و كل سنه و انتوا طيبين طبعاً لقيت العيال هايمانين قوى و لاحظت ان الغياب زياده شويه
فسألت على الغايبين دول
قالوا لى يا ميس عندهم النهارده راندفو
عندهم ايه يا اختى
راندفو يا ميس هو انتى ما عندكيش النهارده
اخرسى قطم رقبتك
اخرس ليه يا ميس
يا بت اخرسى خلينا فى الدرس
كلهم فى نفس واحد لأ النهارده مش عايزين درس بقى خلينا فى المود الحلو اللى احنا فيه
مود حلو ايه يا بت انتى و هى طب و المنهج اعمل فيه ايه
يا ميس كبرى بقى
اكبر ايه باقول فيه زفت منهج لازم نخلصه
ما جتش من يوم بقى
فبصيت لهم و قولت لهم طب عايزين ايه يعنى
عايزين نقعد ما نعملش حاجه
طب خلاص ارغوا مع بعض بس بصوت واطى
و خلصت الحصة
و فى الفسحة كان عندى اشراف و طلعت عشان انزل العيال الحوش
و ربنا ما يوريكم يا مؤمنين
زى ما اكون دخلت الاتوبيس المكيف
العيال كانوا عايزين البوكس ييجى يلمهم مش مدرسين ينزلوهم
ادخل اجيب البنات من فصل الصبيان و اجيب الصبيان من فصل البنات
و الهدايا كانت بتتوزع كده عينى عينك
و واقفه مع واد لقيت فى ايده هدية
باقوله ايه دى يا احمد
لقيت بنت جايه بتأنججه
و بتقولى يرضيكى يا ميس ما يجبش هديه لخطيبته
قولت لها يجيب لك ايه يا حبيبتى
هديه يا ميس
فباقوله و هى بقى اللى جايبه لك الهديه
فقالى اه
قولت لها شكله بخيل يا بت و بيستقطعك و قمت مزعقه لها و منزلاها الحوش
بالتفت ورايا لقيت بت واقفة مع واد فى فصل بتديله هديه روحت رايحه لهم
قولت لها يا بت هو انا كل شويه اجيبك من فصل و بتدى الهديه لمين المرة دى محمود طيب
فالواد زغر لها و قالى يا ميس بتجيبيها منين
قلت له لسه جايباها من 3/2 كانت مع أحمد عبد الله بتديله هديه ( ما حصلش كنت باضحك عليه )
انتى ايه جايبة عشر هدايا النهارده
فراح مبرأ لها و البت راحت مبرأه لى
و قالت له و الله ما حصل
قلت لها انتى بتكدبينى
فقالى يا ميس الكلام ده حصل
فمشيت و ما ردتش عليهم
و قعدت على كده لغايه الفسحة ما خلصت بازعق فيهم و الم فيهم من هنا و هنا
و دخلت بعد كده الفصل التانى وكان بنات برضه
و لقيت نفس حالة الفصل التانى و الهدايا و كده
بس لقيت بنت ماسكه كشكول سلك شكله تحفة
و كل شويه تكتب فيه كلمه و تقطعة و تكتب و تقطع و تكتب و تقطع
فالفضول مسكنى روحت بابص على اللى بتكتبه لقيتها بتكتب مودى
قلت لها الله يخرب بيتك يا بعيده انتى بتبوظى كشكول بـ 15 جنيه عشان الواد الأومليت ده أه يا ميس
يا بت ده ما يستاهلش
بحبه
حبك برص يا هبله
الله يا ميس
الله ياخدك يا بعيده يا بت اتنيلى على خيبتك ده واد شكله غلط
راحت بصت لى و قعدت تكتب و تقطع تانى
فقلت لها حرام عليكى فلوس ابوكى اللى بتضيعيها دى شيلى الكشكول و روحى قطعيه هو أوفر
و على أخر اليوم كان كل واد و بت نازلين شايلين هدايا
و انا لأ شوفتوا الفرسه

الإثنين مايو 02, 2011 12:02 pm

ليه يعنى انا كمان قلت

التورته شكلها روعه تتاكل اكل
والميس فى القصه دى قشطه ........ ودمها شربات انا كان عندى ميس قمر فى ثانوى اخدت عندها درس خصوصى وكنت ناوى اعيد لها السنه ومش اسيب الثانووووووى ابدا
يوميات مدرسه أجن من الطلبة 435585387

الإثنين مايو 02, 2011 8:25 pm

الحلقة السادسة
=============================================

بقى انا طول الفترة اللى فاتت كنت باتعامل مع العيال بمنتهى الذوق و الرقة و الأدب و كنت باتعامل معاهم بطريقه ادمية جداً بس للأسف اكتشفت ان الكلام ده ما بياكلش معاهم خالص فقررت أبلطج عليهم شويه و ارجع للإجرام من جديد رغم انى مبطلاه من سنين

المهم دخلت انا الحصة و لقيتهم قاعدين بيتكلموا كالعاده و مش عايزين يتلموا و لا يحترموا نفسهم
فقعدت ازعق فيهم و يا ابنى بس يا حبيبى اهدى ما فيش فايده
و فجأه لقيت مدرس داخل عليا الفصل
بيقولى فى ايه يا ميس
ما فيش حاجه
و اللى يغيظ بقى ان العيال قعدوا زى الكلاب اول ما شافوه على باب الفصل
ما اخبيش عليكم الموضوع ده حرق دمى جداً
فقالى انا هاحضر معاكى الحصة دى يا ميس
يا سلام تنور
و الراجل قعد و انا ابتديت اكتب لقيت الكشاكيل طلعت بقدرة قادر و ابتدوا يكتبوا
اتغظت اكتر
و لقيته بيسأل عيل كشكولك فين يا عمر
نسيته يا مستر بس دى أول مره و الله
فى سرى أه يا ابن اللذين ده انت عمرك ما جبت لى كشكول
لقيت المستر ده بيقلع الجزمة و رزع بيها الواد فى وشه
و قاله هاتها يالا و على الله تنسى الكشكول بتاعك تانى طلع بسرعه حاجة اكتب فيها
الواد جه جرى جابها له و رجع تانى مكانه
اتفرست اكتر
و ابتديت اشرح و المستر ده قاعد لى
و العيال ساكتين و مركزين
و فجأه عيل نسى نفسه و حب يستظرف
لقيت المستر بينده عليه مصطفى
نعم يا مستر
تعالى هنا
الواد طلع زى الرهوان
قاله انزل
وطى رقبته و لقيت القلم بيرن على قفاه حتة رنه
و قاله بعد كده ادخل مكانك
بينى و بينكم الدم غلى فى عروقى يعنى العيال دى اللى يعاملهم بالجزمة يقعدوا معاه زى الكلاب
و خلصت الحصة على خير و شرحت يمكن 3 دروس متأخرين
بس قررت الحصة اللى بعدها اغير من معاملتى
فاستعنت بخرطوم حلو كده كبير و طلعت الحصة التانية
و أول ما دخلت و شافوا الخرطوم بصوا لى و ضحكوا
و شويه استظراف بقى الخرطوم بينقط و احطه لك فى الحنفية يا ميس و انتى هاتسقى بيه الزرع من هنا و الرزاله بتاعتهم دى
فضربت بيه واد على رجله
لقيته بيضحك و بيقولى و النبى انتى سكر و مش لايق عليكى الشر
جيت اضرب اللى جنبه
و الله انتى طيبه سيبك من الخرطوم ده
يا نهار اسود طب اعمل ايه تانى
و واقفه بازعق و الوش بالخرطوم يمين و شمال و هما برضه بيضحكوا و يستظرفوا
لقيتهم فجأة سكتوا
اتارى الساحر جالهم
ما تتخضوش كده مش ابو تريكه
ده المستر ابو جزمه
فماسكتش بقى المره دى
نسيت نفسى و نسيت انى ميس و ان فى راجل معايا فى الفصل
و وقفت ازعق بعلو صوتى
طبعاً ما انتوا لازم دلوقتى تسكتوا ما دام جالكم اللى بيديكوا بالجزمه بس عشان انا محترمه معاكم و باعاملكم على انكم رجاله مش عاجبكم
طب و دينى من هنا و رايح هاتشوفوا منى ايام سوده يا سنه زفت
لقيت المستر بيقولى طب عايزه منى حاجة يا ميس
لأ شكراً
و خرج و روحت هابده الباب وراه
و وقفت لهم عايزه اشوف مين فيكم النهارده شايف نفسه راجل عشان ابعزق بكرامته الأرض و اخليه عبره لباقى البهايم
العيال خافت من الطلعه اللى طلعتها و سكتوا
طلعوا الكشاكيل و اكتبوا و على الله اسمع نفس
و انا باكتب كانوا ساكتين بس فجأه الصوت ابتدى يطلع
فبصيت ورايا لمحته بيتكلم
فصرخت فيه اسلام اطلع بره
الواد طلع عند السبورة
لأ بره الفصل خالص
حاضر
و بعد كده طردت لى يمكن 6 عيال كمان
بس ما سكتوش قعدوا يفتحوا كل شويه الباب عليا و يفتحوا الشباك
اقفل ده يفتحوا ده
روحت طالعه لهم و الواد اللى فى وشى لقيت نفسى من غير ما احس ايدى بتسلم على وشه بكل قوتى زى قلم عماد حمدى فى الخطايا
و بابص على الخمسة الباقيين لقيتهم لزقوا فى الحيطة و ربعوا ايدهم
روحت رايحة لزعيم العصابه اللى فيهم
و كانت بالصدفة البنت بتاعته معدية
روحت لطشاه فى كتفه و قلت انت بقى الدكر اللى فيهم مش كده وروحت جايباه من التى شيرت بتاعه و لزقاه فى الحيطه و قلت لهم على اسمع صوت كلب فيكم تانى انتوا فاهمين
دخلت الفصل لقيت العيال قاعدين مرعوبين بعد ما شافوا القلم اللى نور اترزعه
و انا ابتديت اشرح تانى و هما مكتومين و اللى بره زى الكلاب
و فجأه واحد اتكلم
اطلع بره يا على
جه يفتح الباب و يخرج
لأ تعالى لى هنا و افتح ايدك
الواد تنح لى
ايه ما سمعتش افتح ايدك
حاضر و فتح ايده
قلت يا رب قوينى و جمدت نفسى و نزلت بأول ضربه على ايده
الواد اتفاجىء و لم ايده من قوة الضربه
لأ لسه افتحها تانى
هو انا هاضرب كام عصايا
ما تعدش زى ما ربنا يرزق
و ضربته عصايتين كمان و ايدى وجعتنى و خفت الضرب بعد كده يكون اى كلام فذنبته مكانه و خلاص
فرجع تانى يضايق العيال
قلت له بص بقى اطلع فوق الديسك و ايدك لفوق
نعم
زى ما سمعت
لأ يا ميس
خلاص تعالى معايا على مكتب المستر ابو جزمة
فالواد لقيته بينط فوق الديسك و شعلق ايده فى الهوا
صنف يخاف ما يختشتيش
شويه و واحد تانى اتكلم
باقولهم مين اللى بيرغى ده
حازم يا ميس
روحت انا لحازم لحد عنده أصل عيب اقوله تعالى
اعذرونى أطول و اعرض منى يا اخوانا و بشنب
قلت له قوم اقف , مش عيب كده اللى انت عملته
على فكره لو عملت كده تانى مش هاسكت لك
بس انا ما باضربش
نعم يا حبيبى
اصلى عامل عمليه فى ايدى
هامدك على رجلك
عامل عمليه فى رجلى
هاضربك على دماغك
عامل فيها عمليه
فى دى بقى عندك حق اكيد عملوا لك عمليه نقل مخ لأن مخ الانسان اللى انت مولود بيه ما بقاش مناسب لجسم الخرتيت اللى بقيت عليه دلوقتى
ده غير طبعاً عملية استئصال الديل اللى لو كانوا سابوه كان زمانك بتتكعبل فيه لغاية دلوقتى
العيال كلها ضحكت و الواد برأ لى
بس الحمد لله الحصة خلصت قبل ما يعمل معايا حاجة
فخدت الكشكول و خدت ديلى فى سنانى و طلعت اجرى
أخ كنت هانسى الخرطوم سلاحى حبيبى
وانا طالعه الواد اللى اترزع القلم لقيته بيبص لى و قالى دى أول مره انضرب بالقلم
كداب رد فعلك بيقول انك واخد على كده
خلاص اعتذرى لى وانا هاسمحك
لسه هازعق لقيت واد بيجيبه من قفاه
تعتذر لمين يا معفن دى تديك بالجزمة كمان
انزلى يا ميس حضرتك وانا هاتصرف معاه
ربنا يسترك يا حسام و نزلت أجرى
ربنا دايماً بيسترها معايا و بيوقف لى ولاد الحلال

الخميس مايو 05, 2011 7:13 am

عامل فيها عمليه
فى دى بقى عندك حق اكيد عملوا لك عمليه نقل مخ لأن مخ الانسان اللى انت مولود بيه ما بقاش مناسب لجسم الخرتيت اللى بقيت عليه دلوقتى
ده غير طبعاً عملية استئصال الديل اللى لو كانوا سابوه كان زمانك بتتكعبل فيه لغاية دلوقتى
العيال كلها ضحكت و الواد برأ لى
بس الحمد لله الحصة خلصت قبل ما يعمل معايا حاجة
فخدت الكشكول و خدت ديلى فى سنانى و طلعت اجرى
يوميات مدرسه أجن من الطلبة 125913

باتابع معااااااااااااااااااااااااااااااااااااااااااااااااك وقلبى مع الموزه
يوميات مدرسه أجن من الطلبة 329328

الخميس مايو 05, 2011 10:13 am

مــــــــــــــتــــــــــابــــــــــعة

الخميس مايو 05, 2011 12:04 pm

يااااااا اخيرا حد بص هنا و هو معدى كده :D مرسى عاشق السهر و رحاب على مروركم الجميل

الحلقة السابعة
=============================================

نزلت الامتحان و العيال امتحنوا و الورق جالى و عينكم ما تشوفش الا النور زى ما اكون كنت بادرس فى مدرسه تانية و لناس تانية و العيال دى زى ما تكون ما شافتش برمجه قبل كده
لدرجة انى شكيت ان الورق اتوزع على فصول غير اللى انا باديها
و هى دى فرصتى بقى للانتقام
طلعت الفصل و ما نسيتش اخد معايا دراعى التالت
أيوه الخرطوم
دخلت الفصل و الورق فى ايدى
قام واحد رذل ايه يا ميس صححتى الورق
ايوه يا زفت صححته
و انا نجحت
استنى على رزقك و ارجع مكانك دلوقتى
ماشى
و ابتديت بقى انده الاسامى و اوزع الورق
احمد حسن
نعم
ايه الدرجه الزفت دى 3 من 10
يا سلام
اه يا حبيبى 3
طب و النبى كويس و اد يا محمد جبنا 3
طب و محمد ماله
اصل احنا حلينا مع بعض
يعنى انتوا الاتنين كنتوا بتحلوا سوا
اه و الله يا ميس و من غير ما نغش من حد
طب هات الورقه يا حبيبى
ليه
هاتها بس
و روحت مغيرة الدرجه و خليتها 1.5
ايه ده يا ميس
هو كده 1.5 ليك و 1.5 لمحمد قسمة العدل
يا نهار اسود
اسود على دماغك يا متخلف و ضربته و قلت له ادخل مكانك قبل ما اكسرك
حاضر
و نديت للتانى عمرو جابر
نعم
بص يا عمرو قبل ما اديك الورقة لف كده ورينى ضهرك
ليه
لف بس
حاضر
الواد لف
قلت له طب خلاص قولى بقى انت بتداريه ازاى
بادارى ايه
الديل
نعم
ما هى دى اول مرة اشوف حيوان من غير ديل
فى ايه يا ميس
فيه ايه انت يا اخى ده انا لو بادرس لبقر كانوا فهموا حاجه لكن تجيب صفر ليه يا ابنى
انا اسف يا ميس
اسف ايه و ضربته برضة و قلت له غور يالا ادخل مكانك
و نديت للى بعده
حسن باشا
نعم
نعم الله عليك يا حبيبى ممكن اعرف جبت عشرة ازاى
بمجهودى يا ميس
عشرة من عشرة بمجهودك ازاى يا ابنى هو انا تايهه عنك
يا ميس و الله بمجهودى
طب تعالى و كتبت له سؤال و قلت له حله
يا ميس ده سمسون صغير ده انا احله بصباع رجلى
كده طب ماشى
و مسحت السؤال و كتبت واحد اصعب منه
و قلت له خد بقى الجوين ده
فقام لى واحد و قالى ايه ده يا ميس أصلى و الله
ما انا عارفه يا رذل و بعدين اترزع مكانك
و بصيت للتانى ما تحل يا عم الحج
حاضر بس انا مش هاقدر على ده
ليه يا حبيبى
اصل انا صدرى بيوجعنى
ولا ما تهزرش و حل السؤال
لأ مش عارف
عشان تعرف انك غشاش
غشاش ايه يا ميس ده انا خايف اخد اوفر دوس
و روحت واخده الورقة وكتبت عليها غشاش
محمود على
أيوان
خد يا ظريف 7
ايه ده انا جبت 7 و الله ما مصدق الحمد لله يا رب
فى ايه يا ابنى هاتعمل فرح عشان 7
دى اول مرة تحصل
مصطفى
ايه
جتك اواه ايه قلة الادب دى انا بقى عايزة أفهم انتوا بيعلموكوا ايه فى البيت
بيعلمونا نحشش
تعالى اطلع بره ايه اللى انت قولته ده
اسف انا باهزر معاكى
اسف ايه و بتهزر ايه مين بقى يا حبيبى اللى بيجيب لك الحشيش بابا و لا ماما
ليه كده يا ميس
مش انت اللى بتقول و بعدين انا باكلمك ليه انا هاعمل لك استدعاء ولى امر بس على الله نلاقيه فايق
خلاص يا ميس انا اسف و الله
ماشى خد يا زفت 8 من عشرة خسارة فيك و ضربته عشان قلة الادب
شكرا
تامر
نعم
9
طب حلو و الله
ماشى يا سيدى بس المرة الجايه عايزاك تجيب عشرة
حاضر يا حبيبتى
ايه حبيبتك دى يالا
يا ميس ما انا باحبك زى اختى و الله
ماشى بس تقول يا ميس
حاضر مش انا بقى زى اخوكى
طبعاً
طب مفيش بقى بوسه لاخوكى
روحت ضارباه بالقلم على وشه
ليه كده ده احنا بنقول اخوات
طب ما انا باربيك اهوه مش اختك الكبيرة
امشى مكانك و بطل قلة ادب
اوكيه يا ميس
فواحد غلس حب يسخنه قاله يا نهار اسود على القلم اللى كلته
قلت له فى ايه يا مؤمن ما انا لسه ضارباك على قفاك الحصه اللى فاتت و لا نسيت
و الفصل كله قعد يضحك عليه

و قعدت أوزع الورق و ضربت لى كام عيل ساقط بس المصيبة انهم كانوا بيضحكوا لما بينضربوا زى ما اكون باهزر معاهم و الله بافكر استغل الاجازة و اشيل حديد استعدادا للسنه الجديدة

الخميس يونيو 23, 2011 4:47 pm

الحلقة الثامنة

=============================================

فلاش باك

بعد ما نزلت من الحصة اللى فاتت قعدت مع زمايلى عماله اشتكى من العيال و من قرفهم و انى خلاص زهقت منهم
فواحده زميلتى قالت لى انا عارفه العيال بقوا عاملين كده ليه ده احنا عمرنا ما كنا كده
لقيت كلامها عمل لى Refresh للذاكرة و خلانى افتكر مواقفى و ذكرياتى ايام ما كنت طالبه
افتكرت ان عمرى ما كنت باريح اى مدرس من صغرى و كنت على طول بتيجى منى شكاوى كتير قوى
أول موقف
انا فاكرة كنت فى الحضانة و كانت عندنا ميس رخمة قوى
فى يوم كنت بابص من الشباك و كنا فى الفصل لوحدنا لقيتها واقفة تحت الشباك فببراءة الأطفال قلت اخلص منها و جبت كرسى حديد صغير بتاع الاطفال ده و روحت رامياه على دماغها
بس ربنا ستر و كانت اتحركت قبل ما الكرسى يقع على دماغها
و هى طبعاً طلعت تجرى على الفصل و سألت مين اللى رمى الكرسى
فقام واد غتيت و فتن عليا
و طبعاً ما خلصنيش من ايدها الا ولاد الحلال

تانى موقف
كنت فى اولى ابتدائى و كانت الميس بتصحح الكشاكيل و انا قاعده ورا
أه قاعدة ورا ايه كلكم كنتوا بتقعدوا فى اول ديسك يعنى
و هى قالت عايزة كشكول الواجب
و انا طبعاً مش هاطلع للهانم عشان اديها الكراسة
روحت حدفاها لها راحت لبست فى وشها
و طبعاً استدعاء ولى امر

تالت موقف
كنت فى خامسة ابتدائى و كنت انا زعيمة التزويغ من حصة العربى
ما كنتش باقبل مدرس العربى ده خالص
و فى يوم قفشنا واحنا مزوغين من حصته
و بعت جابنا و طبعاً كلنا انضربنا فى الموضوع ده
بس انا ايه بقى
مش هاقول ما انضربتش
بس العيال كلها قعدت تعيط الا انا وقفت له بابص له بغيظ و ايدى فى وسطى و جايباه من فوقه لتحته بقرف
و طبعا العيال كلها دخلت مكانها و عدت على خير الا انا استدعاء ولى امر و فضلت متذنبة الحصتين
بس الحقيقة بابا الله يرحمه قاللى بلاش بصة القرف دى لأنه بنى ادم زينا
و طبعا سمعت كلام ابويا

رابع موقف
كنت فى اولى ثانوى
انا فى ثانوى عمرى ما التزمت بيونى فورم خالص
كنت على طول بالقميص و البنطلون
يهديكى يرضيكى البسى جيبة يا بنتى
و انا لا يعنى لا
فى يوم جه الناظر بيفتش على الزى
طبعاً اول ما دخل اتصدم قاعده له بالمنظر ده فى اول ديسك
أه ما انا بقيت اقعد فى الاول
فقومنى و كان حظى انى كنت لابسه تاتو فى ايدى
البلاستيك اللى ما بيتقطعش
قاللى ايه المنظر ده و هو فى قمة الأرف
قلت له نعم
فين اليونى فورم
ما انا لابساه اهوه
لابسه ايه ده يونى فورم المدرسة
اه
أه ايه يا بنت ايه المنظر ده
معلش يا مستر اصل بابا ما عندوش فلوس يجيب لى اليونى فورم
يعنى ما عندوش فلوس لليونى فورم و عنده فلوس للزفت اللى فى ايدك
ده تاتوه
هاتيه
حاضر وروحت قالعاه
الراجل من غيظه حب يقطعه بس ما قدرش
قلت له مستر ما تحاولش ما بيتقطعش عايز مقص و شغلانه كبيره
فبص لى بغل
قلت له ما تضايقش نفسك
و روحت واخداه من ايده ورميته من الشباك
و قلت له خلاص كده
قاللى اه خلاص و قال للمستر اللى كان علينا ما تقعدهاش الحصتين بتوعك
و ابن اللذين وصى الدادة تدخل فى كل حصة تقول للمستر اللى علينا يذنبنى
بس على مين كنت باصعب عليهم و يقعدونى

خامس موقف
كنت فى تانية ثانوى
كانت حصة الرياضة و المستر بتاع الرياضة ما كانش بينزل لى من زور الحقيقة
فانا قاعده و نفسى اطلع من الحصة و للأسف ما لحقتش ازوغ
المهم قعدت و ما رضيتش اطلع الكشكول
جه عندى انتى ما بتكتبيش ليه
مش معايا كشكول
ليه بس كده
نسيته
طب طلعى ورقة اكتبى فيها
حاضر
رجع الراجل يكتب بص لقانى برضه ما باكتبش
ايه ما بتكتبيش ليه
اصلى اكتشفت انى كاتبه فى كل الكشاكيل فى النص يرضيك يا مستر ابوظ كشكول
لا طبعا
و راح قاطع لى ورقه و جابها لى و رجع يكتب
روحت نادهه عليه مستر
نعم
ممكن قلم
أه ممكن على وشك
لأ على وشى ايه قلم اكتب بيه
لأ اطلعى بره بدل ما ارتكب جنايه النهارده
حاضر
و طلعت بس ما مشتش فضلت واقفه له عند باب الفصل مش عايزة ابعد
فصعبت على الراجل و قاللى طب ادخلى يا بنتى اسمعى الشرح و ابقى هاتى الكشكول المرة الجاية
فقلت له لأ ده انا واقفه هنا عشان الناحية التانية شمس مش عشان الشرح كتر خيرك يا مستر انا مرتاحه كده
بس انا مش مرتاح غورى فى داهيه وعلى الله اشوف وشك فى حصتى تانى

سادس موقف
كنت فى تالته ثانوى
بقى احنا بعد ما فشلت محاولاتنا فى التزويغ من المدرسه بسببى
لأننا كل مرة كنا بنزوغ كنا بندى البواب 3 جنيه و نزوغ
ففيه مرة حبيت ارخم عليه ففتح لنا الباب و بيقولى الفلوس
قلت له روح اشتكينا للمديرة و جريت انا و صحابى
المهم اننا بعد الموقف المنيل ده ما بقيناش عارفين نزوغ
و احنا ماشيين فى الحوش لقينا اعلان عن تنظيم فريق للكشافه
قلت لهم بس فرصتنا و بكده مش هانحضر الحصص و هانفضل اليوم كله فى الحوش كشافه بقى
روحنا كتبنا اسامينا عند الكابتن اللى جايبينه ينظم الفريق و لقيناه واد صغير و شكله لسه متخرج و أمور
المهم اول يوم فى الكشافة نزلنا من اول حصة
و ده قالنا بصوا انا رايح مشوار اجى الاقى الاوتاد اتدقت عشان نبتدى الشغل لما اجى
طبعا احنا و لا فى دماغنا حاجه قعدنا نلعب و نرغى لحد ما جه هو الساعه 11
الراجل اتصدم لقى الحوش زى ما هو و ما عملناش حاجه خالص
و بصوت عامل زى المدفع اجمعوا كلكم قدامى
وقفنا كلنا فى الضل
لأ تعالوا هنا فى الشمس
انا لما اقول كلمه تتسمع و عقاباً ليكوا هاتفضلوا ساعتين فى الشمس
قلت الله اما اغزيك يا شيطان و لبست الكاب عشان الشمس
راح جاى مطيره من على دماغى
ايه ده
فى ايه
بترمى الكاب ليه يا كابتن
ما هو انا مش موقفك عشان تلبسى لى كاب احنا كنا فى الجيش بنقف بالست ساعات فى عز الشمس
جيش ايه اتارى الواد يا عينى طلع سايكو و جاى يطلع عقده علينا و مش واخد باله اننا بنات
فروحت جايبه الكاب من على الأرض و قلعت الشارة و روحت رامياهم له جنبه
و قلت له معلش اصل انا وحيده و ما ليش جيش
و بصيت لاصحابى راحوا كلهم عملوا زي ما انا عملت

سابع موقف
كنت فى اولى المعهد
حتى دكاترة المعهد ما سلموش منى
كنت داخله متأخرة
و الدكتور ما بيحبش كده طبعاً
فوهو قاعد فى مكانه و من غير ما يبص لى
الحماره اللى داخله دى تطلع بره
ما هو حضرتك راجل كبير و قد ابويا الله يرحمه و عشان كده مش هاقدر أرد عليك
و بابص لقيته قايم يجرى
بس انا ايه طيران كنت بره المعهد خالص ما لحقنيش الحمد لله و احنا ساعتها كنا لسه فى سنه اولى يعنى ما حدش كان لسه يعرفنى فى الدفعة و الا كنت اتشنيرت خالص
سورى يا جماعه على المصطلح اللوكال

ثامن موقف
كان فى امتحان عملى و كان الدكتور بيسأل كل واحد سؤال واحد بس واللى ما يعرفش يجاوب فى ساعتها ياخد صفر
انا جه الدور عليا بيسألنى ما عرفتش اجاوب
راح كتب لى صفر
فبصيت له باستعطاف و صعبت عليه
راح قالى انتى شكلك مذاكرة يا بنتى خلاص انا هاسألك سؤال تانى
حاضر يا دكتور اتفضل
و سأل سؤال اسهل من الاولانى
و انا برضه ما رديتش
ايه يا بنتى ده سؤال سهل خالص و من المحاضرة اللى فاتت
ثوانى بس هافكر
الراجل بمنتهى الغيظ اللى فى الدنيا تفكرى ايه انا غلطان ومش صفر واحد بس لأ صفر تربيع و اطلعى بره

كل ده طبعاً غير مدرسين التدريب اللى كنا بنطلعهم معيطين من الحصص

كفايه كده بقى لا تقولوا عليا كنت مشاغبة و لا حاجة انا باحكى لكم بس

بصراحة لما افتكرت اللى كنت باعمله قلت اللى العيال بيعملوه فيا ارحم برضه من اللى كنت باعمله

السبت يونيو 25, 2011 2:05 pm

كتابتك جميلة ..والله مابجامل ..والله يعين اللى حواليكى عليكى ..قال كشافة قال ..بس الحمد لله أكيد أتخرجتى ؟ ورحمتيهم

كان ليه صديق مايتخيرش عنك كدة فى الكلية ..من كتر مشاغباته التقيلة الادارة عاوزاة يتخرج من الكلية بأى طريقة ويبعد عنهم ..المهم الاخ دة مادخلش أمتحان آخر مادة علشان كان عاوز يدخل الدور التانى ....حاجة خاصة بالجيش والتجنيد ...المهم لقى نفسه ناجح آخر السنة

عمل ايه ؟
رفع قضية على الكلية انهم نجحوه برغم غيابه عن الامتحان ..وقال للقاضى انه فيه تزوير ..القاضى حكم عليه بالنجاح رغم تأكده من غيابه

عارفه ليه ؟
كان كشافة ..

السبت يونيو 25, 2011 2:27 pm

من علامات الكتابة الجميلة ..انها لازم تكون موحية ..يعنى بتتولد فينا حاجات مش قاصدها الكاتب أو الكاتبة

وكتابتك وقصك متدفقة وسلسة . وبتفكرينى بأيام جميلة

السبت يونيو 25, 2011 6:54 pm

:D مرسى يا خالد على الكلام الجميل ده و على متبعتك

الحلقة التاسعة

=============================================

( الحصة الأخيرة )

انا لازم اسيب المدرسة

بقى انا كان بقالى معاهم فترة و مستحمله قرفهم الا اليوم ده صممت و قلت هاسيب المدرسه يعنى هاسيب المدرسه
طلعت الحصة زى كل مرة و انا جوايا امل و كلى تفاؤل
مش عارفه على ايه يعنى بس المهم طلعت
كتبت الدرس و كالعاده معظمهم ما كتبش ما اهتمتش وقلت كل واحد يعمل باصله و خلينى احسن منهم
و هابتدى اشرح الدرس ما رضيوش يسكتوا كالعاده و ابتدوا يستظرفوا و يرخموا
بس انا اليوم ده كان مودى زى الزفت و ما كنتش فايقه لهم خالص و ما كانش فيا حيل استحمل قرفهم بالمرة
فوقفت لهم فى وسط الفصل و قلت لهم انا خلاص زهقت و مش مكملة معاكم جتكم القرف
و جيت اخرج من الفصل راح ولد واقف لى على باب الفصل
و قاللى و الله ما انتى خارجه
اوعى خرجنى بدل ما ارتكب جنايه النهارده
لأ مش هانسيبك تخرجى و انتى زعلانه
يا ابنى اوعى احسن لك
لأ عشان خاطرى ما تخرجيش كده طب ربنا ياخدنا كلنا لو ما قعدتيش
ايوة ربنا ياخدكم كلكم عشان انا استريح و زقيته و قولت له غور بقى من وشى
خرجت من الفصل و سيبت الحصة
لقيت الناظر فى وشى
رايحة فين يا ميس
مش هادخل الحصة يا مستر
بمنتهى البرود ما ينفعش يا ميس حصتك لازم تدخليها
لأ مش داخلة و بعدين هو انا اخدت ايه من المدرسة عشان يجيلى ضغط و لا سكر
ايه يا ميس الكلام الفارغ ده ما ينفعش تسيبى حصتك كده
روحت غايرة من وشه و نزلت و واحده زميلتى طلعت الحصة مكانى
و طبعاً زميلتى زعقت و عملت الواجب معاهم و هو اساسا كان فاضل على الحصة عشر دقايق
و اول ما نزلت انا ما قدرتش خلاص حسيت انى هاعيط من الغيظ و الفرسه
و نزلت لى بعد الحصة تقولى خلاص زبطتهم لك
انا خلاص ما ليش دعوه بيهم تانى
يعنى ايه
يعنى ده اخر يوم ليا فى المدرسة انا مش جايه تانى
لأ مش جاية تانى ايه طب و 3 اعدادى
ربنا ياخد 3 اعدادى و اللى عايز يدرس لـ 3 اعدادى
انا قولت اللى عندى
و لسه ما كملتش لقيت باب المعمل بيتفتح و لقيت وفد من الفصل نازل لى
حقك علينا يا ميس
غوروا من وشى انا مش طايقاكم
يا ميس و النبى خلاص
يا ابنى خلاص انا مش هاديكم تانى ان شاء الله يجيبوا لكم مدرس يديكم بالجزمة لكن انا بقى مش طالعة حصتكم تانى
يا ميس احنا بنحبك و الله
و انا بقى مش طايقاكم
لأ بتحبينا و باين علي عينيكى اهوه الحب بينط منهم
ليه يا حبيبى الننى بتاع عينى قلب قلوب زى توم و جيرى
شوفتى بتهزرى اهوه يعنى مش زعلانه
لأ زعلانه و بجد ما بقتش طايقاكم امشوا بقى
لأ مش هانمشى غير لما نصالحك يعنى نعيطك و ما نصالحكيش
تـ ايه تعيطونى مين دى يالا اللى بتعيط
يا ميس ما هوه باين على عينيكى اهوه انك معيطه
لا يا حبيبى مش معيطه
أمال ايه اللى فى عينيكى ده ايه عرق من الحر
لا يا خفيف عندها تبول لا ارادى
خلاص بقى يا ميس ما تزعليش
يا ابنى الساعة بقت 3 ايه ما عندكوش بيوت و اهل يسألوا عليكم
لأ ما وراناش حاجه غيرك يا قمر و لازم نصالحك النهارده
و انا بقى ما باتصالحش
و قلت لزمايلى انا خلاص هاسيب المدرسة و روحت على البيت
بس اول ما وصلت زمايلى قعدوا يتصلوا بيا و يتحايلوا عليا عشان اجى تانى يوم و وعدونى يجيبوا لى حقى من العيال
روحت تانى يوم لقيت ولد مؤدب قوى نازل لى المعمل
بيقول لى انا اسف على اللى حصل امبارح
يعنى انت يعجبك اللى حصل ده يا محمود
لأ ما يعجبنيش طبعاً حقك عليا
يعنى انت ما شفتش اللى خالد عمله
هو عمل ايه طيب
عمل ايه انت جالك زهايمر يالا ما شفتهوش و هو بيرد عليا ببجاحه
يا سلام ده واد قليل الأدب قوى
انت اهبل يا ابنى
يا ميس اصل انا كنت غايب امبارح و اول ما جيت العيال قالوا لى انك زعلانه فقلت لازم انزل اصالحك
يعنى انت كنت غايب
اه
و نازل تعتذر لى
اه
و انت مالك تعتذر ليه
عشان ما تزعليش
اطلع الفصل يا محمود
لأ مش هاطلع غير لما توعدينى انك هاتطلعى الحصة الجايه
لأ مش هاطلع لكم تانى غير لما يعتذروا لى الأول
حاضر هما عايزين ينزلوا بس خايفين
لأ مش هايعتذروا هنا يعتذروا قدام المدرسه كلها
ازاى
فى الاذاعه
فين
فى الاذاعه
حاضر يا ميس ده حضرتك تأمرى
ماشى
و فعلاً فى الاذاعة طلع ولد من الفصل و اعتذر
و لما جه معاد الحصة التانية لقيت محمود جايلى قبل الحصة
قلت له فى ايه
جاى اخدك
تاخدنى ايه يا ابنى ما انا طالعه خلاص
طب هاتى الكشكول و الاقلام
ليه
هاشيلهم لك
ماشى خد اهم
طب اطلعى بقى قدامى
يا ابنى اهمد بقى و اطلع
لأ مش هاطلع الا معاكى
خلاص بس استنى خد معاك الخرطوم كمان
حاضر يا ميس
طلعت الحصة لقيت السبورة ممسوحه و لقيتهم و اقفين لى على باب الفصل
فى ايه
مستنينك
ليه
عشان نعتذر لك
خلاص ادخلوا
لأ لما تضحكى الاول
مش هاضحك و ادخلوا
لأ هاتضحكى
لقيت الناظر بيقولى فى ايه يا ميس الوقفه دى
ما فيش داخلين اهوه
ادخلوا بقى ما تجيبوليش الكلام
لما تضحكى
و الله هانزل تانى
محمود قاللى كشكولك و اقلامك معايا
اشبع بيهم
خلاص خلاص هاندخل اهوه عشان سحس بمب ده يهمد ( يقصدوا الناظر )
و دخلوا و دخلت معاهم
و حاولوا يضحكونى شوية نكت و استظراف و ايه الجمال ده و مش لايقة عليكى التكشيرة و كده يعنى
و الله لو ما سكتوش هانزل تانى
فطلع ولد وقف بينى و بين السبورة و قاللى مش هادخل غير لما تضحكى لى
مش هاضحك لك
طب توت توت يا رب اموت لو ما ضحكتى
ادخل يا عم اللمبى
راح قاعد لى على الأرض و قاللى مش داخل و اضحكى بقى
لالالالالالالالالالالالالالالالالالا انا اساساً قرفانه منكم يعنى ما حدش هايدخله
طلع واحد و قاللى يا ميس من عينيا الجوز و مناخيرى اللوز
و سحب الواد من قفاه و دخله مكانه
و انا كتبت الدرس و بعد شوية هزار و كده قدرت اشرح الدرس
و لما جيت نازله قالولى خلاص مش زعلانه
خلاص
مع السلامه
سلام
بس تصدقوا قدروا يقنعونى ما اسيبش المدرسة
الظاهر انى اتعودت على رخامتهم خلاص

يوميات مدرسه أجن من الطلبة

يوميات مدرسه أجن من الطلبة

رد: يوميات مدرسه أجن من الطلبة

رد: يوميات مدرسه أجن من الطلبة

رد: يوميات مدرسه أجن من الطلبة

رد: يوميات مدرسه أجن من الطلبة

رد: يوميات مدرسه أجن من الطلبة

رد: يوميات مدرسه أجن من الطلبة

رد: يوميات مدرسه أجن من الطلبة

رد: يوميات مدرسه أجن من الطلبة

رد: يوميات مدرسه أجن من الطلبة

رد: يوميات مدرسه أجن من الطلبة

رد: يوميات مدرسه أجن من الطلبة

رد: يوميات مدرسه أجن من الطلبة

رد: يوميات مدرسه أجن من الطلبة

رد: يوميات مدرسه أجن من الطلبة

رد: يوميات مدرسه أجن من الطلبة

رد: يوميات مدرسه أجن من الطلبة

رد: يوميات مدرسه أجن من الطلبة

رد: يوميات مدرسه أجن من الطلبة

رد: يوميات مدرسه أجن من الطلبة

رد: يوميات مدرسه أجن من الطلبة

رد: يوميات مدرسه أجن من الطلبة

رد: يوميات مدرسه أجن من الطلبة