يوم من عمر اعضاء المنتدى

الحريف


متشكرة اوى اوى علي كلامك الجميل وان يومي عاجبك ويارب يكون يومك احسن واريح من يومي

وطبعا هارد علي اسيلتك

انا عندى 21 سنة

ثالتة سياحة


انا من مصر

ام بالنسبة للحب هو في حد مش بيحب كل قلب ربنا خلقة لازم يحب

وانا مستنية اسمع يومك

شكرا يا منى على الموضوع
وانا عايزة اسال الحريف
ايه اصعب قرار اتخذته فى حياتك؟
كم مرة انجرحت من حد قريب منك؟
وانت بتدرس ايه؟
ومنين؟
سورى انا اسألتى كتير يا حريف

موضوع جميل اوى يا منى وعجبنى اوى
انا عايزة اسال الحريف
ايه اكتر اهتماماتك؟؟؟؟؟؟؟؟؟؟
وايه هدفك اللى نفسك تحققة؟؟؟؟؟؟؟؟؟؟؟؟؟؟؟؟؟؟؟

موضوع جميل يا منى
بارك الله فيك
اما بالنسبة لسؤال الحريف
انا عايز اساله
هل انت علاقتك كويسة مع ربنا؟؟؟؟؟؟؟؟
وهل ليك اصدقاء؟؟؟؟؟؟؟؟؟؟؟؟
ولو عندك. علاقتك معاهم عاملة ازاى ؟؟؟؟؟؟؟؟؟؟
وايه اكتر حاجة انت بتحبها فى حياتك؟؟؟؟؟؟؟؟؟؟؟؟؟؟
لو مش عايز تجاوب مفيش مشكلة
وانا مستنى اشوف يومك...............................


مع تحياتى
الحب فى الله

شكرا يا منى وشكرا للحريف على اجباته الجميلة ولى سوالاين للحريف
1 - موقف شعرت فيه ان الصدقه ابق من الحب
2- انت انسان عاطفى ولا عملى يعنى ايهم يتحكم فيك اكتر العقل ام القلب
تقبل مرورى واسالتى بود

النهاردة هحكيلكم على يوم من عمرى


السلام عليكم ورحمة الله وبركاته



انا : محمد عبدالله احمد . من المحلة الكبرى . 17 سنة



المفروض ابقا فى اولى كلية بس حصل ظروف ومقدمتش الورق السنة دى وهقدمه السنة الجاية انشاء الله



وفى الاغلب هدخل كلية الاداب وانا اللى بيسألنى بقوله انا فى كلية اداب



ومابدخنش وانا بشتغل فى محل ملابس



فعشان كده يومى بيبقا ممل عشان بيبقا من الشغل للبيت



المهم انا بقوم من نومى على الساعة 8 واصلى والفطار والحاجات اللى انتوا عارفنها دى وكلنا بنعملهاواجهز نفسى واورح الشغل



وافضل هناك لحد بالليل برده على الساعة 8 كده



فى الفترة دى بقا بتبقا حياتى كلها



ابقا مع اصحابى اللى معايا فى الشغل وعلى أد مانبقا هناك فى تعب



بس الضحك والهزار والشغل بينسونا كل حاجة وكل التعب



وافضل اتكلم بقا مع الزباين والشعب الغلبان وهما بيشتروا منى



ويفضلوا يفصلوا معايا فى الحاجة وانا بصراحة بيصعبوا عليا اوووى وببقا نفسى اديهم الحاجة ببلاش خالص



بس هعمل ايه البضاعة اصلا بتيجى غالية واحنا بنبقا مظلومين زاى الناس



وقابل بقا حوارات ومشاكل عجيبة بين الناس وكل واحد بيتخانق على لقمة العيش



وكله واحد بيبقا نفسه هو بس اللى يبيع والباقى لا



وشغلنتى بتخلينى اشوف كل الناس وانواع الناس كلها



بيجيلى الغنى والفقير ويجيلى الحلو والوحش وبيجيلى المحترم والمحترم برده



يعنى من الاخر بشوف كل انواع الناس



وبعد الكام الساعة الطحن دول ممكن اخد اصحابى ونروح نتمشى شوية وده قليل عشان كل واحد بيبقا نفسه يروح ينام .



انا بقا عن نفسى برجع البيت ببقا عايز انام بس مابنامش ممكن انزل لاصحاب تانية غير بتاع الشغل



ممكن نلعب كورة او اروح اتمشى معاهم شوية او نروح لاى حد من صحابنا



وارجع البيت ممكن اقعد على الكمبيوتر شوية بعد كده اقوم انام واصحى الصبح ونفس اليوم هو هو .



وهكذاااااااااااااااا.

وهو ده يومى

وعارف انه ممل بس الحمدلله على كل شئ

يومك جميل يا محمد
واحساسك عالى
وشكل شخصيتك بعيدة عن الملل
شكلك مبدع
اتمنالك حياة سعيدة

يومك حلو اوى وعجبني ومش ممل بالعكس دية يوم مليان بالناس

وعلشان كدة يبقي مليان انفعالات واحساس

ربنا يقويك ويسعدك

شكرا ليكى يا منى
اوانا هختار
ادهم الرومانسى


تحياتى
smsma

هههههههههههههههههههههههههه
انت فرحان فيا لية كدة يا محمد
بس برضة مش هجاوبك على سؤالك اياة
انا تحت امركم
تحبوا احكى يومى الاول ولا اجاوب على اسئلتكم الاول
ان حبيتوا تسالوا اتفضلوا حبيتوا احكى الاول مش هتاخر واكتب يومى
وانا تحت امركم فى اى نوع من الاسئلة
ما عدا سؤالك يا محمد

سبت لي ايه من يوم رحيلك


غيري انا..و الآسى


و كتف شايل الهم عنك


سبت فيّ حتةمنك؟


لأ..ده كل حتة فيّ منك ضحكتي,حنيتي


جناني..حريتي


قلبي الاهبل..زي قلبك


كل ملامحي.. نسخة منك


يااااااه


حتى الوجع ..ورثته منك

انا مبقولش كدة لحبيبتى اللى كانت لا الكلام دة لادهم الجزء الاول
حياتى عبارة عن جزئين جزء كنت فية مش بفكر فى شىء عايش
وخلاص حياتى كانت عبارة عن ضحك وهزار وحب وخلاص
حصلت حاجة فى حياتى ممكن نعتبرها صدمة او حادثة لخبطتنى
وحيرتنى وخلتنى فى حالة عدم اتزان حتى بعد ما فوقت منها مش
عارف ارجع زى الاول. انا حاليا مش مكتئب بالعكس بس جوايا
وجع جوايا حنين للاة حتى لما بضحك فى الم لما بابتسم ممكن اللى
قريب منى يحس بدمعتى.


دى كانت عبارة عن مقدمة ضرورية لحد عاوز يفهمنى لانكم عشان تعيشوا يومى
لازم تعرفوا ملامحى وملامحى مش عيون وشعر لا ملامحى هى احساسى وفكرى
وشخصيتى.انا ممكن اقولكم كلام حلو اوى عن نفسى وعن شخصيتى ولو قولتة مش
هاكون كداب لا هاقولة لانى حاسس بية ممكن يكون احساس غلط بس دة احساسى.
انا شاب لكن عمرى ولا الف عام
وحيد ولكن بين ضلوعى زحام
خايف ولكن خوفى منى انا
اخرس ولكن قلبى مليان كلام

انا ادهم
25 سنة
برج السرطان
خريج تجارة اسكندرية
محاسب فى مستشفى خاص
ليا 4 اخوات
ياسمين متجوزة ومعاها ادهم
ادهم الماثل بين حضراتكم
مريم حبيبة قلبى وعشقى وصاحبتى وملاكى ثانوية عامة
يوسف اخويا اللى مطلع عينيا اعدادية
امى فنانة مطبخ وعليها نفس مالوش حل وهى برضو مالهاش حل بس من غير معاكسة
ابويا مدير مدرسة وبيحب امى اوى
وبيحب النوم برضو اوى
بس مش اكتر ما بيحب امى. والله ممكن اكتر


المهم

انا يومى بيبدأ انى اصحى حوالى 9
اخد حمام وفى الغالب مش بحب افطر الصبح
رغم انى متاكد انة مهم بس باكون مش فايق
شغلى بيبدا حوالى 10 مالوش ميعاد محدد بالظبط
بس ممكن 9 وممكن 10 بس مش اكتر من كدة
شغلى منظرة العام بيقول انة قمة الملل حسابات وارقام
وخلاص بس انا بحب الارقام واهم شىء فى شغلى انى باتعامل مع العملاء
انا اللى بحاسبهم انا بحب العلاقات والمعاملات وبحب الدفء وبحب اعمل صداقات
جديدة ومعارف .
انا ليا اصحاب كتير معايا فى الشغل وبرضو من خارج الشغل
والمدير بتاعى مقتنع بيا اوى
انا قبل ما امسك الشغل هنا اشتغلت سنة فى الغردقة
المهم
الشغل هنا ساهل اوى وفى الغالب انا باكون فاتح الايميل وانا فى الشغل
لانة ساعات بيكون فى شغل قليل وعادة الشغل مش متعب غير فى اخر
يومين فى الشهر بيكونوا مستهلكين للعقل اوى ومجهدين ليا جدا وفى الغالب
اخر يوم فى الشهر بابيت فى المستشفى عشان اخلص الشغل واقفل الحسابات
وانا مش تعبان لا انا مبسوط من الشغل لانى بالاقى فية نفسى وباحس بمجهودى
فى معاملة المدير ليا ومعاملة اصحاب المستشفى.
الشغل فى الغالب بيبدا من 10 لغاية 7 او 8 بالليل ممكن اتغدى فى الشغل وممكن
لا وممكن اقوم بشغل العصابات واهرب اتغدى فى البيت وارجع تانى لان بيتنا قريب
اوى من المستشفى ومحدش يقولى ريحة ادوية وكلام من دة لا احنا فى دور كامل
لوحدنا تكييف وتليفزيون وحمام ونت بس النت على حسابى انا فى الخباثة كدة
احنا عندنا نت فى المستشفى بس تحت عشان فى اجهزة بتحتاج نت.

بخرج من المستشفى اروح البيت اتشطف واغير هدومى واقعد شوية تحت مع ابويا وامى
واخواتى واطلع فوق اقعد ع النت .
او اتفرج على الدش انا غالبا عاشق للكورة العالمية وعاشق للعبة التنس جدا جدا
وبحب السينما العالمية اوى وبحب برضو البرامج السياسية.
وممكن اقعد مع مريم نحكى ونشتغل شغل النميمة اللى على اصولة
مريم على فكرة صاحبتى اوى اوى وكل قصصى واسرارى معاها كلها بجد وهى برضو
نفس الحكاية كل اسرارها معايا حتى اللى ممكن تخجل انها تحكى لصاحبتها الانتيم عليها
بتحكيلى انا علية وبتسالنى فى كل شىء م الاخر احنا شخص واحد
لدرجة انها معندهاش ايميل واوقات بتكلم اصحابها من على ايميلى انا
ولو مكنتش فى البيت باكون مع اصحابى اللى ولله الحمد وبشكر ربنا اوى عليهم
كلهم منحرفين الحمد لله هما كلهم مؤهلات ومناظر بس اساتذة حشيش
انا الحمد لله مش بشرب اى شىء لا سجاير ولا حشيش ولا بانجو ولا الكلام دة خالص
انا بحب البحر اوى اوى وهو كمان ممكن يكون كاتم اسرارى وبحكيلة على اى شىء يخصنى
ومكدبش عليكم ساعات بيرد عليا وبينصحنى اى نعم كل نصايحة مباخدش بيها بس برضو كتر
خيرة.
وانا مبسوط بيها وراضى الحمد لله ويكفينى الابتسامة فى وشوش الناس اللى اعرفهم
يكفينى الحب اللى باحسة مع ابويا او امى او اخواتى او اصحابى او عم محمد بتاع الاسانسير
او رضا بتاع الشاى او على اللى ساعات بيجيب لينا السندوتشات ويخنصر نص الفلوس
او فتحى بتاع كشك الصحافة اللى مش بيدينى الباقى ومش بيعرف لايقرا ولا يكتب
او مدام عيشة اللى معايا فى الشغل وكل كلامها عن الكرنب اللى معجبش سبع البرمبة
مع ان لو الكرنب بس يبقى الراجل دة نفسة حلوة وهيدخل الجنة
والبنت ريم اللى كل شوية تنصحها عشان تزود الملح كأن الاكل ما هو الا ملح

يعنى م الاخر الحمد لله انا مبسوط ومرتاح وبشكر ربنا

ودة يومى ولو فى اى اسئلة انا تحت امركم

اول ما قريت كلامك عرفت قد اية انك انسان مرهف الحس بس حسيت انك زى ما بتقول كدة انك شايل هموم بس بالرغم من كدةمبسوط وعارف

تتمتع بحياتك ودة حاجة حلوة اوى منك ام بقي بالنسبة ليومك انا شايفة انة يوم شغل وبس ربنا يعينك

وتعرف اية اكتر حاجة عاجبتني اقول الصراحة من غيركدة او كدة ابوك بجد عاجبني اوى

ربنا يسعدك يارب

السوال بقي ودة سوال مهم اوى اوى ولازم تجاوب؟؟؟؟؟؟؟؟؟؟؟

ابوك مش عاوز يتجوز تاني؟؟؟؟؟؟؟؟؟

انت يا محمد بتقول كام مرة كان حب بجد؟؟
انا مش فاهم هو فى حب بهزار
انا اى احساس باحس بية بيكون صادق ومن قلبى
وعمرى الحمد لله ما كدبت فى احساس لا على نفسى
ولا حتى على غيرى ان مكنتش متاكد من مشاعرى مش باتكلم
وانا حبيت مرتين ومش عارف من حسن حظى ولا من سوء حظى
المرتين انتهوا واحنا لسة بنحب بعض انتهوا لظروف معينة
بس انا من رايى لو كان الحب انتهى لان حبيبتى خانتنى او حبت غيرى كان احسن
واريح بالنسبة ليا كان ممكن اتالم شوية واتعذب بس كنت هانسى
بس دلوقت مش لاقى سبب واحد انى انسى.
ودول اصعب لحظتين فى حياتى
وهى عموما لحظات الفراق بتكون مؤلمة

اما احسن اللحظات اللى فى حياتى فهى
لحظات الحب بانواعة لما امى بتحضنى وبتقولى بحبك اوابويا او اخواتى
او لما باحس انى عملت اللى اصحابى كانوا متوقعينة منى او لما بابص فى عيون حبيبى
وبشوف السعادة والراحة والطمانينة.


من احبة الله قذف حبة فى قلوب العباد الحمد لله
انا بصلى الحمد لله
واسلوبى وحياتى ماشية مع الدين .


الحاجة اللى حصلتلى ولخبطت حياتى
هو الفراق اللى حصل فى اخر حب ليا
لانى بصراحة كنت بحبها اوى اوى
وهى كانت بتحبنى اكتر منى
بس بقى نعمل اية فى ارادة ربنا
بس الحمد لله على كل شىء.
وشكرا على كلامك الحلو يا محمد اتمنالك حياة سعيدة



اما بالنسبة لنور واسئلتها
ابويا على فكرة عينية زايغة اوى
وبيحب البنات الحلوين
هاتى انتى بس صورتك وانتى بفيونكات واوعدك امشيلك فى الموضوع
ومن غير رشوة انتى فى مقام مرات ابويا على اعتبار ما سيكون يعنى
وبعدين انا باتكلم عن يوم فى حياتى انا المفروض تحبى تتجوزينى انا
مش ابويا ع العموم فى بيتها انا ولا ابويا واحد.
واحب اشكرك على ذوقك ورقتك ومشاعرك الحلوة
وربنا يسعدك

اما بالنسبة لاسئلة منى
اكتر موقف مضحك فى حياتى كتير الحمد لله
انا بحب الهزار جدا جدا
وانا ليا صاحب بصراحة مسخرة
عامل زى يونس شلبى بالظبط
مش فى الشكل بس فى الاسلوب
وميعرفش حاجة خالص فى اى شىء
بس هو فاكر نفسة جيمس بوند
وكلامة كلة بطريقة يونس شلبى
كذكرتين اة هما اتنين
ومواقفة لا تعد ولا تحصى وبصراحة شديدة انا بافقد هيبتى ووقارى
وانا معاة باضحك من قلبى بجد لدرجة انى بخاف اموت
مرة روحنا لواحد صاحبنا كان والدة متوفى
عاوز يقولة البقية فى حياتك بهية حياتك
هههههههههههههههههههههه
الواد اللى والدة كان متوفى العصر نام ع الارض من كتر الضحك
ولما يحكي موضوع نعرف انة محصلش
لدرجة والله والدة توفى من حوالى 4 شهور
كنا بنضحك واحنا بندفنة شوفتى بقى
هو مسخرة


المواقف المؤلمة ممكن تكون كتيرة
بس الحمد لله مش بتعيش اوى معايا
لانى من النوع اللى بيحب يتالم
او بحب اعذب نفسى شوية
وانا على فكرة بحب اشوف دموعى
بحس ان قلبى لسة عايش وبينبض
مش معنى كدة انى كئيب
بالعكس بس ممكن تقولوا ساعات بحب اعيش مع نفسى
وطبعا مش كل لحظات المى لحظات فقدان للحب
وصدقونى والله العظيم
لما باشوف حد بيبكى فى التليفزيون باتالم اوى وساعات ببكى
رغم انى عاقل كفاية يعنى وعارف ان دة تمثيل


سؤالك انى راضى عن نفسى؟
اعتقد سؤال اجابتة معروفة
ازاى اى حد عاقل يرضى عن نفسة
وبالضرورة لو مجنون برضة هيرضى عن نفسة ازاى
لو رضينا بحياتنا يبقى خلاص كدة الطموح مات جوانا
بس خلى بالك فى شق تانى لسؤالك
اللى هو خاص بالرضا اللى بينى وبين ربنا
اكاد اجزم انى انا الحمد لله راضى جدا جدا والله
وراضى جدا باى شىء ربنا يرزقنى بية
لانى مقتنع جدا
لو علمتم الغيب لاخترتم الواقع
فانا مقتنع ان اللى ربنا رزقنى بية هو الخير ليا
وان كنت انا مش حاسس انة خير
فاحساسى دة لضيق افقى يعنى عقلى بالبلدى على قدة.


حلمى ممكن اكون شايفة بسيط
بس انا حاسس انى طماع اوى
انا حلمى هو السعادة
وسعادتى والله فى احضان اللى حواليا ليا
سعادتى فى حضن امى ليا وابويا
فى حضن ياسمين ومريم وابتسامتهم
فى حضن يوسف
انى الاقى حد يحس بيا ويفهمنى
واحس انى خليتة سعيد
بحب اوى اشوف ابتسامات اللى حواليا



بس كدة معلش ان كنت شغلتكم
وشغلت بالكم بحكاياتى
اتمنالكم حياة سعيدة