زحمة يا دنيا

اذيكم انا نور عادل جديدة هنا في المنتدى واتمني منكم انكم تقبلوني صديقة ليكم ويكون ليا كل الشرف اني اتعرف عليكم كلكم

طلب مني اني اكون ضيفة عليكم هنا في يوم من حياتي وكم اسعدني هذا الطلب ويارب اكون ضيفة خفيفة عليكم

وقبل ما اقولكم يوم في حياتي لازم ابدى اعجابي بالفكرة

يلا بقي كل واحد يمسك ايد التاني علشان الدنيا زحمة جوة اوى ومش عاوزة حد منكم يتوة مني جوة هيضيع ومش هعرف الاقية

صلو علي النبي انا كل يوم في حياتي بيختلف عن اليوم الا قبلة وعن اليوم الا بعدة حياتي زحمة اوى وساعات بحس انها فاضية اوى

مليان ناس من اول بيتنا لحد كل واحد او واحدة بقابلهم في حياتي مشكلتي يا ناس واقر واعترف بيني وبينكم انها مشكلة تعباني اني مش بحب اسيب حاجة تعدى كدة

كل مكان ادخلة لازم يكون ليا فية احس اني موجودة مش بحب السلبية واحب اسمع اوى للناس وبيني وبينكم ساعات ودني بتوجعني كل يوم اصحي من النوم ومن اول ما اصحي

تبدا الحوارت في البيت وكلام من الا انتو طبعا عارفينو من الكلام علي المذاكرة والكلية وحالي الا مش عاجب الست الوالدة والا هاتشكيني لبويا ومن شغل البيت الا انا مقصرة فية ومش بساعدها

مع اني والله بساعدة بس هي كدة شكلها بترسم علي مساعدة اكبر وبعدين انزل وندخل في حوارات تانية من موصلات ومعاكسات وطبعا دية حاجات كلكم مجربنها زى بالظبط وربنا ينفخ في صورتي

واوصل للكلية وندخل في حوارات جديدة محاضرات وكلام بنات وولاد بترسم وتعيش الدور ومش عارفة مين سيب مين ومين بتحب مين وتطلع في دماغنا جنونة ونقول لبعض يلا ننزل وسط البلد

ناكل برة ونخرج شوية وهنا بقي حوارات تانية خالص طول مانا ماشية اشوف واتفرج علي الدنيا واحوالها وارجع البيت همدانة ومصدعة الاقي البيت مليان عيال مين دول يا ستي انا عارفهم بس بستعبط

عيال اختي علي عيال الجيران بيلعبو ربنا يخلي ودول حوارتهم مش بتخلص خالتو هاتي فلوس نشترى حاجة حلوة ومش عيال اختي بس لا انا ديمقراطية عيال البيت كلة علشان كدة بفكر اني اشوف شغل

علشان اكفي المصاريف الا ورايا دية واقرر اكون ست بيت وادخل المطبخ ومقدرش اقولكم علي حوارات المطبخ ويجي معياد اهم حوار في اليوم كلة حوار اوضتي ادخلها علشان اكون بقي مع نفسي

بس مش بلحق لسة يادوب هستريح الاقي الموبيل بيرن خير يارب الاقي صاحبتي انتي يا بيت انا مش لسة سيباكي اية الا حصل تمسك ودني ومش تسيبها الا لما اقولها خلاص ارحميني واخر ما ازهق


ا اقفل الموبيل ونام وطبعا معرفش انام اقوم افضل قاعدة كدة لحد ما يطلع الصبح وادخل انام كام ساعة علشان اقوم وادخل في يوم جديد ربنا يستر

نور نورتى منتدى سهر الليالى وعلى الاقل ضمنا ان احنا مش ها نحتاج نجيب حاجه تنور المنتدى اهو النور جانا لحد عندنا
وحقيقى يومك جميل يا نور ويبختك على ان كل يوم ليكى مختلف عن الى قبله وربنا يخلى عيال اختك
وسيبك من حورات المطبخ وركزى فى الطبيخ احسن يشيط وتبق شغلانة ويريت تقفلى الموبيل علشان وجع الدماغ
تقبلى مرورى بس من غير دوشه وبود

اولا اهلا بيك في منتداك سهرالليالي
ثانيا كل سنه وانت طيب
ثالثا بدايه موفقه وموضوع جميل ومفيد جدا