كل واحد مننا ليه ماضى , ليه ذكرى

الإثنين ديسمبر 22, 2008 1:31 pm

عدى عليك يوم كنت فيه مع حبيبك وليك فيه ذكرى.. ولسه فاكره لحد انهاردة؟

النهاردة وبدون مقدمات طويلة أقولك أني هتكلم وهنتكلم سوا عن أجمل لحظات
السعادة اللي عشتها مع حبيبك واللي أنت لحد النهاردة لسه بتفتكرها لما ييجي
عليك نفس اليوم من كل سنه بتفتكرها وتلقي نفسك لو زعلان تنبسط وتضحك
وتترسم علي شفايفك ابتسامة جميلة اووي
لما يحصل موقف معين تشوفه قدامك ترجع بذاكرتك لنفس الموقف اللي حصل مع
حبيبك بتاع زمان
لما تسمع أغنية في الراديو أو ع الموبايل تفكرك بحاجة وتلقي
عنيك تدمع من غير قصد ولوحدها وتلقي نفسك تدخل أوضتك وتاخد جنب وتقعد
تفتكر ذكريات الحب
لما تصادف وتشوف فيلم ف التليفزيون أنت بتحبه تلقي نفسك
تقعد مخصوص عشان تتفرج عليه وتزعل أوي لأنك مشوفتوش من أوله ومهما
أتعرض ف التليفزيون تلقي نفسك برضو عاوز تتفرج عليه لأنه بيفكرك بأيام حلوة أنت
عشتها.بيوم حلو أنت دخلت فيه السينما مع حبيبك

رغم أنك قد تكون بعدت عنه أو بعد عنك بس أنت لسه لحد النهاردة الأيام دي فى بالك مبتتنسيش
أيام ممكن تكون عملالك مشكله دلوقتي مع الشخص اللي انت
مرتبط بيه ..بس غصب عنك مش قادر متفتكرهاش لانها خلاص أصبحت جزء
منك ,من تاريخك ف الدنيا ,من ذكرياتك اللي عمرها ماهتتنسي

في مثل بيقول أن عمر الأنسان في الدنيا مش بيتحسب غير بالأيام الحلوة اللي أنت
بتعيشها .وكذلك عمر الانسان في الحب مش بيتحسب غير بالأيام الحلوة اللي مرت
عليكي أنتي وهو ..أو عليك أنت وهي أكيد كلنا ابتدينا نفكر في اللحظات دي

أكيد كل واحد فينا أبتدي يسرح دلوقتي ..ودماغه تاخده لبعيييييييييييييييد أوووي
شايف في ناس تفكيرها راح لأول يوم قالت فيه بحبك لحد ,
أول كلمة بحبك اتقالت ليك من انسان انت بتحبه ومش ناسيها,
أول لحظة لاقيت قلبك دق فيه لأنسان, ولا يوم خرجتوا فيه مع بعض وكان احلا يوم ف عمركوا

انا شايف اتنين بيفكروا ف يوم قضوه مع بعض في دريم بارك لما عملها مفاجأة
وراحلها مخصوص رغم انه كان عنده شغل وهي كانت فاقدة الأمل انوا ييجي لكن
ساب كل حاجة وراحلها واتصل بيها من قلب دريم بارك ولما قالتلوا انت فين قالها أنا
واقف وراكي ولما التفتت مصدقتش نفسها وكانت عاوزة تاخدة بالحضن قصاد كل
الناس وكانت سعيدة لدرجة انها لحد نهاردة مش مصدقة انه دة حصل فعلااا

او قضوه في مركب ف النيل للقناطر أو كانوا قعدوا في كوستا كافيه ,أو كانوا حتي أكلوا فيه
في كشري التحرير , يوم سهروا فيه ع البحر ف اسكندرية لحد الفجر وصوت
الموجة لحد الحظة دي ف ودانهم ,وريحة البحر لسه في مناخيرهم كل اما يشموها
يفتكروا اليوم دة

أو يوم زوغتوا فيه من صحابكوا ودخلتوا سينما الصبح وشوفته فيلم
عن العشق والهوي أو أي فلم تاني رومانسي وبعدين فضلتوا تتمشوا فيه مع بعض
واليوم دة حكتلها كل حاجة عنك وكنت مبسوط أنك بتفضفض وتقول كل ف قلبك
ومن قلبك من غير خوف

يوم أفتكر فيه عيد ميلادك انتي وكان عملك مفاجأة
متخطرش علي بال حد وكان أجمل مفاجأة في عمرك كلها ..يوم كنت زعلان منها
أوي وهي عملت المستحيل عشان تصالحك وفضلت وراك لحد لما اتصالحتوا ورجعت
لبعض تاني ..وكانت ف اليوم أكتر ما يكون من الرقة والأنوثة والرومانسية

ياااااه أيام حلوة أوي كتير ولو قعدت من هنا لتاني يوم مش هقدر اقول كل اللحظات الحلوة اللي مرت علينا واحنا بنحب

بس انا النهاردة قررت أفتحلكم الباب وكل واحد يحكي ويقول ويفتكر معانا اجمل يوم
في عمره كان شكله ايه ؟ وكان مع مين ؟ مش شرط يكون بس مع حبيبك ؟ مش
شرط يكون مع انسان انت مرتبط بيه ؟ ممكن نوسع الدايرة شوية ونخليها أجمل
لحظات ف العمر كله في أي حاجة ومع أي حد ..مع بابا وماما وأخوك مع أعز
أصحابك ..وطبعا مع حبيبك لأن أجمل اللحظات فعلا هي اللي بتكون مع
توأم روحك ..روح قلبك

جايز تكون اللحظات اللي هنفتكرها دي حلوة أوي لدرجة انها تخلينا نضحك اووي
وننبسط أووي ونفرح أوووي

وجايز تخلينا نبكي أوووي ونعيط أوووي بس من الفرحة
ونتمني لو جت اللحظة دي تاني ولو للحظة واحدة وتمشي تاني
بغض النظر عن القسوة اللي شوفتها من الحب ومن انسان بتحبه ,
بغض النظر للجرح اللي انجرحته

تعالوا ننسي أيام المرارة اللي شوفناها من الحب وعشان الحب ..
وبغض النظر اذا كانت الذكريات دي هتفرحنا أووي وتزعلنا اوووي ف نفس الوقت
تعالوا نفتكر أجمل لحظات ف عمرنا مع واحد حبناه وحبنا

انا منتظر ردودكم وانتوا بتفتحولي قلوبكم

X<x>X~.*.~ < الـــــ؛ـــــحـــــ؛ـــــريـــــ؛ـــــف > ~.*.~X<x>X