ربنا يرحمك يا اسلام

السلام عليكم
ممكن اخواتى واخوانى بعد ما ضحكنا سوا واستمتعنا ممكن لو سمحتم تبكوا معايا ايوة نبكى بدموع وحرقة والم على حالنا واننا رخاص اوى وملناش قيمة فى بلدنا انا بس هاحكيلكم حاجة حصلت من اسبوعين فى اسكندرية واحد غلبان وضعيف اسمة اسلام ايوة سواق التوك توك اسمعوا حكايتة ونتكلم تانى بعد الحكاية:


اتفضل يا بيه ادخل، بيتك ومطرحك ادخل......، معلهش المكان مش قد المقام، بس ادى
الله وآدي حكمته، والفقر عمره ما كان عيب، انت طبعا جاي علشان تسألني على إسلام، بص يا بيه إسلام كان ابني الأخير، على اربع صبيان، ما كانش كمل سنة لما ابوه مات، كنت كل ما ابصله احس ان قلبي بيتقطع عليه، نصيبه يطلع الدنيا من غير أب ، قلت لا انا لازم ادخله مدرسة، لازم اعوضه عن حرمان ابوه،

المدرس كان حاطه في دماغه مش عارفة ليه، كان يقوله دايما يا معفن، يا ابو ريحة وحشة، إكمن إسلام ما كانش عنده غير هدمة واحدة يلبسها، يفضل لابسها طول الأسبوع واغسلها يوم الجمعة ويلبسها تاني يوم السبت ، طيب انا كان معايا اجيب له وما جبتلهوش؟؟؟!!،اعمل ايه واجيب منين ؟؟!! خمس عيال كتير على واحدة وحدانية يا بيه، والشغل في البيوت برضه ما بيجيبش كتير، كان دايما يضربه ومسميه بليد الفصل، العيال الصغيرة صحابه كانوا يضحكوا عليه ويشتموه،الواد اتعقد وكان بيهرب من المدرسة، وما فلحش في التعليم، قلت مش مشكلة ده نصيبه، يتعلم صنعة زي اخواته، وديته عند عمه العجلاتي،

لكن عمه ده كان قلبه حجر، كان دايما يضربه ويبهدله، وانا اقول مش مشكلة علشان مصلحته علشان يتعلم، جه في يوم عمه ما كانش موجود الواد خد عجلة وفضل يلعب بيها قدام المحل، عمه شافه كده اتجن ، مسكه وفضل يضرب فيه لغاية ما الواد عملها على روحه من الضرب،

الواد دخل عليا متبهدل هدومه مليانه دم وقرف، انا لو كنت راجل كنت رحت لعمه وبهدلته من الضرب، لكن اعمل ايه بس ، لما الست تكون وحدانية بتحس بكسرة جامدة اوي يا بيه، كل اللي عملته خليته ما يروحش الشغل تاني عند عمه، ووديته شغلانة تانية، بقى يتنطط من شغلانة لشغلانة، ما فلحش في حاجة، اصله كان عامل زي البنت، غلبان ومنكسر ، ولما حد كان ييجي عليه كان يقعد يعيط،

كان كل يوم يكبر قدام عيني واحس انه بيتقطع وهوا مش نافع في حاجة كده، لغاية ما بقى شاب كبير، جه يوم كان ماشي في الشارع، الظابط كان نازل بالميكروباص ، شافه ومسكه فتشه ما لقاش معاه حاجة، قام سابه ، لكن مخبر ابن حرام وطى على ودن الظابط وقاله ده اخو احمد، احمد اخوه اصله كان زمان بيبيع حشيش،الظابط مسكه ، وفي القسم قالوا إنهم لقوا معاه حشيش كان بيبيعه على القمة،

انا كنت عاملة زي المجنونة لما عرفت، وقفت قدام القسم، استنيت عبد الغفار بيه وهوا طالع من القسم، جريت وطيت على جذمته ابوسها ، قلتله حرام عليك ابني ما عملش حاجة ما تبهدلهوش ، إلهي ربنا ما يحرمك من ضناك، العساكر ضربوني في الشارع بالجذم ،

عرفت بعديها من اللي كانوا معاه في التخشيبة ان المخبرين قالوا له امك الفاجرة راحت لعبد الغفار باشا وقالت له انا انام معاك بس طلع ابني من السجن، الواد سمع كده كان بيتقطع، بس كان عارف ان امه ما تعملش كده، واننا اشرف من الشرف نفسه،

القاضي اداله تلات سنين سجن، فضلت اعد الأيام يوم ورا التاني وانا قلبي كل يوم بيتقطع، لغاية ما طلع، لما طلع ما كانش زي ما دخل، كان ساكت على طول، وكان كل فترة ييجوا المخبرين يقبضوا عليه ويبيتوه في التخشيبة اسبوع ولا حاجة وبعدين يطلعوه، وهو كل يوم يبقى ساكت اكتر ومنكسر اكتر، وغلبان اكتر

انا لقيت الواد بيضيع من ايدي، جبت اخواته وقلتلهم اخوكم ده اتظلم كتير اوي ولازم نعمله حاجة، لمينا له قرشين بالعافية اللي استلف ، واللي باع دهب مراته ، واللي كان معاه قرشين على جنب ، ودفعناله تقديمة علشان يشتري توك توك، وبعدين كل شهر من اللي بيجيبه نسدد القسط، صبري جارنا اخده وعلمه السواقة، الواد كان نبيه ما شاء الله عليه، اتعلم في اسبوع يسوقه،

تعرف يا بيه انا لسه فاكرة اول يوم دخل عليا فيه بعد ما اشتغل على التوك توك، كان فرحان اوي، عمري ما شفته فرحان كده، دخل علينا شايل شيل، إشي فاكهة وإشي حاجات حلوة، تعرف يا بيه كان نفسي حاجة واحدة بس لما شفت فرحته ، كان نفسي اموت في لحظتها، كان نفسي اموت وهوا فرحان علشان ما اشوفهوش وهو بيزعل تاني، تعرف يا بيه لما الفرحة بتيجي بتنسيك كل لحظة زعلت فيها، كل القهر اللي عشته في حياتك ما بيسواش حاجة قدام لحظة فرحة، انا قلت خلاص بقى الدنيا حتضحك لنا، خلاص كفاية علينا كده حزن وشقا، ما هو مش معقول يعني يكون الواحد حياته كلها شقا ، وإحنا خدنا الشقا كله يا بيه، كفاية لازم بقى تضحك لنا وتزهر في وشنا
لحد ما جه اليوم اياه، الظابط مسكه وعايز ياخد منه التوك توك، إسلام كان عارف كويس إنه لو التوك توك اتاخد مش حيعرف يطلعه تاني ، الحضانة بتاعة العربيات في محرم بيه مليانة تكاتك اتاخدت من صحابها ومعرفوش يطلعوها تاني، إسلام وطى على ايده وقاله بلاش يا بيه، ابوس ايدك اوطي على جذمتك ما تاخدش التوك توك، العساكر ضربوه، قال للظباط طيب انت زعلان من التوك توك، خلاص انا ما يرضنيش زعلك، التوك توك مزعلك ، طيب انا ححرقهولك خالص، واحرق نفسي معاه، الظابط شتمه بأمه وقاله لو راجل اعمل كده،

الواد دخل قعد جوه التوك توك ، من القهرة كب جركن البنزين على نفسه وولع في نفسه وفي التوك توك،

تعرف يا بيه انا ما زعلتش يا بيه لما عرفت إنه مات، قد ما زعلت لما الشيخ بتاع الجامع قال عليه إنه مات كافر، طيب يا ناس لما إسلام يكون مات كافر ، اومال الظابط ابو قلب حجر اللي كان عايز ياخد منه التوك توك يبقى ايه ؟؟؟ ، يبقى عبد الغفار بيه اللي لفقله قضية الحشيش ايه، يبقى المدرس اللي خلاه يسيب التعليم ايه ؟ ، يبقى عمه العجلاتي ايه، تبقى الدنيا دي كلها اللي جت عليه علشان فقير وغلبان ايه؟؟!!

بالذمة يا ناس حد يبقى كافر ويبقى اسمه اسلام برضه ؟؟!

لا مؤاخذة يا بيه الكلام اخدني وما قلتلكش ، تشرب ايه ؟! ...تشرب ايه ؟؟!!



انا بس عاوز اسالكم نفس السؤال مين الكافر رغم انى مش معترض ان اسلام مات كافر بس مين اشد كفر اللى احنا خنقناة وعذبناة وطلعنا عينية فلما صرخ وقال اةةةةةةةةةةةةة نقولة بشويش ولا الللى بيعذبنا.
مين الكافر اللى كفر بربة مرة وغصب عنة ولا الكافر بربة طول عمرة ومين الكافراللى موت نفسة ومعذبش حد ولا اللى كل يوم يعذب ويموت غيرةمين الكافر اللى بيقول اةةةةةةةةةة ولا الللى بيجلدنا وبيتلذذ بعذابنا.
مش عارف ان كنت باتكلم بعقلانية ولا زعلى وعاطفتى على اسلا خلتنى اقول واتكلم ياريت نتكلم سوا واسمع رأيكم.
واخيرا انا عمرى ما شوفت اسلام بس شوفت غيرة وزية وكل اللى كان نفسى اعملة انى احضنة بعد ما اتغسل واصلى علية ونفسى ربنا يرحمة وبادعيلة ان ربنا يرحمة ويرحمنا واتمنى انكم تدعولة ان ربنا يرحمة.
بس خلاص عشان انا تعبت
سلام
ادهم

ربنا يرحمه

ويغفرله

صعب اوووووووووووى بس الحقيقه دايما كده مره



حنضل