احمر من كدة مفيش

راجع من المستشفى الصبح بعد غياب اسبوع لا بيا ولا عليا .. ومحدش يقولي خير الف سلامه كنت ليه في المستشفى .. اكيد مش عيان يعني الحمد لله .. ده شغلي يا ناس بما اني للاسف اتحكم عليا اكون شغال فى مستشفى
المهم للحظ لابس القميص الاحمر بتاعي اذ لاقيت الناس كلها بتبصلي وواحد بيقول : يا فتاح يا عليم يا رزاق يا كريم ده احنا لسه عالصبح امال على الضهر هيلبسوا ايه
الصراحه شكيت في نفسي اكون نسيت الزعبوط الاحمر في دماغي ولا حاجه .. بعد الليله الكحلي الي قضيتها في المستشفى اللي كانت كلها دماء حمرا بالطبع .. وشوية لاقيت المحلات بدأت تفتح وخير اللهم اجعله خير الحياة بقى لونها احمر.. ودباديب نطت .. وقلوب حمرا بطير في الجو .. وحاجة تجيب الضغط .. بصيت في الموبايل اعرف احنا كام النهارده الاقي اليوم المعهود 14 فقراير..ده الي عامل حسابه وكنت ناوي مطلعش من بيتنا عشان مراوح صدري بتطبق عليا اليوم ده
ركبت الميكروباص .. الاقيلكم يا اخوانا واحد شايل قلب احمر يجي 6 متر في 6 متر ومكتوب عليه طبعا هابي زلانطين والبت لاطعه صورتها عليه تقولش الست هيفا في زمانها .. بصيتله بكل حسره وحقد .. وقلتله في سري يابن المحظوظه .. مكملتش لاقيت العجلة فرقعت .. والمشروع اتعطل بينا .. وطبعا اضطرينا ننزل نشوف مواصله غيرها .. وكل ما نوقف مواصله ميرضاش عشان طبعا القلب الطيب .. لحد ما جه واحد من الركاب الصعايده اخدته الجلاله وقال للولد
صعيدي يا بوي على حج صعيدي واجول الحج : عارف يا ولد لو مركبناش دلوجيت انا هاخد الجلب ده واعمله مرتبه وامدد عليه وسط الطريج ولما اصحى هجطعهولك حتت وهنتفه ريشه ريشه
طبعا مخبيش عليكم حسيت ساعتها زي ما كون تعبان وارتحت .. زي ما اكون عطشان وشربت
والحمد لله وصلت بيتنا بسلام .. وقررت زي بقيت البشر الطبيعيه اخد دش - عيد بقى - ودي فرصه لا تعوض .. اطلع من الحمام والخوخ على خدي الاقي ماما محضرالي الترننج الاحمر .. قلت يمكن بتعوضني الحرمان اللى انا فيه .. ميضرش برضه .. وماله احمر احمر هيحصلي ايه اكتر من كده .. واهو نار بيتنا ولا حمار الفلانتين
عملت موبايلي صامت .. وقلت مفيش مفر من الهروب الاعظم الا وهو النوم .. الواحد احسن حاجه في اليوم ده ينام لحد ما اليوم ده يعدي على خير.. واللون الاحمر ده الي قربت اكرهه يختفي عندما يغيب قرص الشمس الاحمر وترجع الحياه بمبي
صحيت و رحت اشوف حاجه اشربها ولا اكلها .. لاقيت والدتي العزيزة واقفه في المطبخ على رجل واحده وكل عيون البوتجاز الحمرا شغاله .. ولما سألتها : خير عندنا عزومه ولا ايه ؟؟
قالتلي : لا انا بعملكم بسبوسه وكنافه عشان عيد الحب
ادهم : الرحمه يارب هو ورايا ورايا
مامتي : طيب شوفي كده صينية البسبوسه وشها احمر ولا لسه
ادهم : لا ده انتوا متفقين عليا بقى انا هروح اشوف حاجه اشربها
ماما : فيه عصير فراوله في التلاجه

ادهم: ربي اني لا اسألك رد القضاء ولكني اسألك اللطف فيه فراوله فراوله اهي حاجه حمرا والسلام في اليوم الي مش عاوز يعدي على خير ده
مفيش ساعتين ببص لروحي فجأة لاقتني لاقتني كبرت فجأة .. ووشي احمر بنزهير.. وتقريبا كده جالي حساسية من عصير الفراوله .. واصر انه يطبع بوسه حمرا على خدي بحرارة الحمى
وبعد شوية دخلت المطبخ تاني اشوف ايه النظام لاقيتها بتطبخ ومجمعه كل الطماطم الحمرا اللي في التلاجه وناويه تعمل طبيخ لا مش غامق طبيخ احمــــــــــــــر من كده مفيش

كل سنه وانت طيب وكل ايامك ساره وكل الوانك احمر في احمر و يخلي لك ست الحبايب ها هي طيبه والا زي حماتي وحشتنا يا ادهم ووحشتنا موضوعاتك الجرىئه الجميله وطريقتك المميزه في الكتابه اسلوبك حلو نورت منتدااااااااااك

تسلمى يا سارة
ست الحبايب مالهاش حل
ربنا يخليهالى
قولوا يارب
وخلى بالك اوعى تكون حماتك معاها باسورد المنتدى
احسن تباتى من غير عشا
نورتى موضوعى
زى ما انتى منورة المنتدى

:-) ;-) ;-( :-| :-( :) ‎:-D:-x

‏:) :) :)

ايوه كده لما كتبت المنتدي رد وحشتنا كتباتك ونقدك والوانك احمر احمر امرنا لله انا زملكاويه بس يوم الفالانتين بنتفق كل المجموعه بتاعتنا وبنلبس احمر ونشتري كل الدباديب والقلوب اهلا بيك يا ادهم موضوع لذيذ ورد ساره الذ حماتها طيبه جدا دانا نفسي ابدل معاها عشان تعرف الحموات الفاتنات ربنا يخلي لك ست الحبايب تنور دنيتك بس اعمل حسابك الا مهات الطيبين اللي مالهمش حل دول بيبقوا مفتريين لما بيبقوا حموات اسالني انا مدوباهم اتنين ماما وحماتي ربنا يخلي لك حماتك لا خر السنه

ههههههههههههههههههههه
واضح يا اسراء ان كل شىء فيكى جميل
من اسلوبك واسمك وابتسامتك ورقة كلماتك
والاهم زملكاويتك اللى اتمنى ن الله اننا نشوف لحظات سعادة
عشان احنا تعبنا اوى والمصحف
وسلملى ع الكونفدرالية وكاس العالم للعواجيز

تقبلوا تحياتى

ميرسي ياادهم كلا مك حلو قول تاني ع رأي سهوره احنا بنتعلم منك ولناالشرف

ادهم ملتش غير اللون الاحمر وتكتب عنه ده احنا الزملكاوية ما بنكرهش فى حياتن غير اللون الاحمر
يكفى انو بيفكرنا بنادى القرن على العموم موضوع جميل ومميز زى كل موضيعك زى ما قالت اسراء
احنا بنتعلم منك وعقبل يا رب ما يبقلى اربع حموات مرة وحده با كده يا بالش مشكور حبيبى ودمت بود

تسلم يا سحرى على مرورك
وعلى فكرة انا زملكاوى - برشلونى - ارسنالى
وربنا يكتر من الحموات مش 4 بس
دة حلم حياتى
انى اتجوز 4
وادهم يحب الزيادة
قولوا يارب

لا بعدالشر انتوا هترجعونا تاني لاربعه هي واحده بس وكمان للمحظوظين واللي عندهم واسطه وحشتوني بجد موضوع جميل والبنات وردودها الجميله مشاركه حلوه وروح اجمل كنا بنشوف خطاب اوباما واتمني حد من الشباب ينزله ع المنتدي صفحتك جميله يا ادهم دايما مجمعانا اهلا بيك يا محمد وحشتني اربعه !