البرامج التعليمية

الأحد يونيو 14, 2009 12:07 pm

ملحوظة همس الاحباب وحنين القلب دول اولادى فلذات اكبادى
وفرنسا هانم دىالسجان بتاعى قصدى الموكوسة يووووووة قصدى حبيبتى مراتى وربنا معايا

ادهم الرايق ..والان اعزائى المشاهدين والمشاهدات فى كل انحاء العالم من البساتين الى بين السرايات موعدكم مع البرامج التعليميه

همس الاحباب :- الو... ايوه يا حنين ازيك

حنين القلب :- ايوه يا خالد مش وقت سلامات دلوقتى الحق المصيبه اللى هيعملها الرايق الاول

همس الاحباب :- ياداهيه دقى ...انا مش ورايا الا ادهم ومصايب ادهم .. عمل ايه تانى ؟؟؟

حنين القلب :- طالع دلوقتى حالا على الهواء مباشره فى قناه سهر الليالى الفضائيه بيقدم البرامج التعليميه

همس الاحباب :- يانهار اسود ومنيل بستين نيله ... ميييييييييييين ؟؟؟؟؟ ادهم بيقدم برامج تعليميه ؟؟؟؟ ازاى ؟؟ ده ساقط ابتدائى اصلا ومش بيعرف يكتب اسمه.. ازاى ده يحصل ؟؟؟ دا احنا واخدينه معانا كماله عدد ...وفين الناس ؟؟؟ فين فرنسا هانم ...دى فضيحه ..لا حول ولا قوه الا بالله ..كده اتخرب بيتنا يا حنين

حنين القلب :- هو انا بتصل بيك علشان تصوت وتطلم .. ارجوك اعمل حاجه يا خالد هنروح كلنا فى داهيه ... لا وايه ..داهيه على الهواء مباشره ...حاول تتصرف يا خالد البرنامج هيبتدى

ادهم :- اعزائى طلبه وطالبات كى جى 2 ..حبايبى القطاقيط ..بلاعم المستقبل وزهور الحدائق ..ده موعدنا مع البرامج التعليميه ..وانا جاى انهارده يا حبايبى وجايب معايا نفافيخ كتيييييييير وحلاوه وشيبشى ..كل واحد يرمى بقى البزازه اللى فى بقه ويخلى باله معايا كويس

انتم عارفين يا حبايبى الفلفسه .. بدءت الفلفسه يا قطاقيط من ملايين السنين ..ايام حكم الاغريق لمصر.. وان الفلفسه بدت متقوقعه فى بدايه عهدها الازلى الى ان بدء الفلفسوف الكبير ابو قراط فى تفتيح وتلقيح علم الفلفسه فاستمد جذورها من كتاب العالم المصرى الكبير عبد الله زويل ( علم الفينو ) ...ثم بدء ابو قراط فى تسريخ مبادئ علم الفلفسه ..وعلى اثر هذا العلم الجليل اكتشف الفلفسوف الكبير اشانتين نظريه النسبيه ..وتلك النظريه تعتمد على احترام الفرد لنسايبه اولا واخيرا.. طبعا اعزائى الصغيرين بعد ماتكبروا كده وتتجوزا هيكون لكل واحد فيكم نسيبه..والنسيب هو ابو مراتك او اخواها .. والشاعر الفلفسوف اشانتين الف النظريه دى علشان نحترم النسيب

المخرج :- تليفون يا ادهم

ادهم :- اعزائى وحبايبى الكتاكيت فى تليفون وصل للبرنامج ...الو

همس الاحباب :- الو ...ايوه ياادهم انا همس الاحباب

ادهم يشاور بايده للمخرج يفصل صوت المتصل

ادهم:- الو ... الو .. ازيك يا خالووووووووود انا فرحان جدا انك بتشارك معانا فى البرنامج

همس الاحباب :- انا بقى مش متنيل فرحان ياهومة... مين قالك تقدم البرامج التعليميه .. وايه الكلام الفارغ اللى بتقوله ده

ادهم :- اعزائى المشاهدين ..الظاهر فى مشكله فى الصوت ..وهنحاول نحلها ..وانا هنقل ليكم كلام خالووود حبيبى ..خالد بيقول انه مبسوط قوى من البرنامج وبيصحى بنته همس علشان تتفرج على البرنامج مع الحلوين الصغيرين

همس الاحباب :- اصحى مين يا جدع ؟؟؟ انت هتجنينى ؟؟؟ ..بقولك ايه يا ادهم... اقفل البرنامج دلوقتى حالا احسن مش هيحصل ليك طيب

ادهم :- طبعا يا همس وكل اصحابى بيحبونى زى ما انت بتحبنى ... وهاحاول افكر فى اقتراحك الجميل ونخلى البرنامج اربع ساعات بدل من ساعه واحده

همس الاحباب :- ادهم يا رايق .... ودين النبى ..لو مقفلتش البرنامج ده دلوقتى حالا هيكون ليا تصرف تانى معاك

ادهم:- طبعا يا روح قلبى هاخلى حلاوه وشيبشى لحبيبتى همس هو انا اقدر انساها

همس الاحباب :- ادهااااااااااااااااااااااااااااااااام ...ابوس ايدين اللى خلفوك ... هتودينا فى داهيه ... انا مش حمل سجن ومرمطه ..وكمان عندنا بنات فى القناه .. ابوس ايدك اقفل البرنامج .. انا خالد صاحبك وحبيبك

ادهم :-ايييييييه الخط قطع .. عموما يا احبابى خالد بيسلم عليكم وبيقولكم فتحوا ودانكم وعنيكم مع عمو ادهم .. احنا كنا بنقول ان زمان من ملايين السنين جه كمان عالم كبير قوى قد البحر اسمه ريتشارد قلب الاسد وده اللى اخترع نظريه المد والجزر ..والنظريه ده من اهم فروع علم الفلفسه ..وهى بتعتمد على المد على الرجلين .. وده طبعا اللى هنجربه فى مهندس الصوت اللى مش عارف يصلح صوت التليفونات وان شاء الله هنمده على رجله

المخرج :- تليفون تانى يا هومة

ادهم :- ودلوقتى مع فاصل اعلانى ....... مين على التليفون ؟؟

المخرج :- ده الطائر الحزين

ادهم :- قوله ادهم فى الحمام ..ولا اقولك الواد ده كلامه صريح قوى .. قوله ادهم نايم

المخرج :- حمام مين ؟؟؟..ونايم مين ياهومة؟؟؟ الناس شايفينك على الهواء

ادهم:- ايوه يا ناصح ..اشمعنى دى اللى فالح فيها ..خلاص ادهونى بس افصل الصوت تانى ..وربنا يستر

اعزائى الكرام مره اخرى نعود للبرنامج وكان معانا اتصال للطائر الحزين ..اهلا يا طائر

الطائر الحزين :- اهلا مين وزفت مين ؟؟؟ ايه المهزله دى يا هومة ؟؟ لو سمحت وقف التهريج ده دلوقتى حالا

ادهم:- طبعا يا طائر انا كمان مبسوط منك وبحييى اقتراحك اننا نخلى المحطه كلها للبرامج التعليميه الهادفه دى علشان نوعى جيل المستقبل

الطائر الحزين :- بلاش تهريج يا ادهم لو سمحت ....انت على الهواء هتودينا فى داهيه حرام عليك

ادهم:- مش عارف فى مشكله فى الصوت ... لكن برضه بنحييى اخونا الطائر على اتصاله ومشاركته فى البرنامج وبنقوله هندرس اقتراحك يا طائر .. ونرجع تانى حبايبى الصغار للبرنامج وكنا بنقول

المخرج :-تليفون ياادهم

ادهم:- الو .. مين معايا

صوت :- انا مدير الامن

ادهم :- للاسف الشديد حبايبى القمامير وقت البرنامج انتهى .. وارجوكم متنسوش العيش والحلاوه ...وربنا يستر

الأحد يونيو 14, 2009 3:10 pm

هههههههههههههه اجمل برنامج واجمل انسان خساره ان البرنامج خلص هستناه بكره وكل يوم وحشتوووووووووني

البرامج التعليمية

البرامج التعليمية

رد: البرامج التعليمية